Rúnar Kristinsson var í dag kynntur sem nýr þjálfari Fram. Hann tekur við liðinu eftir sex ár hjá KR, þar sem hann er goðsögn.
KR ákvað að framlengja samning Rúnars ekki í haust og leita á önnur mið. Það gengur þó ekkert að finna nýjan þjálfara þrátt fyrir að fjöldinn allur hafi verið orðaður við starfið.
Rúnar, sem stýrði KR einnig frá 2010-2014, var spurður út í stöðuna í Vesturbæ og þjálfaraleitina.
„Ég hef sagt við alla sem ég hef talað við í dag að ég ætla ekki að svara þessari spurningu. Ég hef auðvitað mínar skoðanir en er ekki að opinbera þær,“ sagði Rúnar þá.
„Auðvitað vilja menn fara á einhverja vegferð og vinna í sínum málum en þeir verða að eiga við það sjálfir. Ég ætla ekki að fara að segja mönnum hvernig þeir eiga að vinna vinnuna sína.“
