Héraðssaksóknari hefur ákært mann fyrir þrjár líkamsárásir, þar af eina sérlega hættulega. Atvikin áttu sér stað þann 4. júlí árið 2020 og virðist sem maðurinn hafi gengið berserksgang þennan dag því hann misþyrmdi þremur mönnum. Einnig vekur athygli hvað málið hefur dregist því hin meintu afbrot voru framin fyrir þremur og hálfu ári.
Hinn ákærði er í fyrsta lagi sakaður um að hafa kýlt mann einu höggi í höfuðið með krepptum hnefa svo hann féll í götuna og hlaut eymsli á höfði hægra megin, eymsli á hægri öxl og mar og eymsli á vinstra hné.
Í öðru lagi er hann ákærður fyrir að hafa slegið annan mann fjórum sinnum með krepptum hnefa svo sá hlaut heilahristing, tognun á hægri ökkla, yfirborðsáverka á hægra hné og yfirborðsáverka og bólgu í hársverði.
Í þriðja lagi er maðurinn sakaður um sérlega hættulega líkamsárás er hann kýldi mann með krepptum hnefa með þeim afleiðingum að hann féll í götuna og í framhaldinu sparkaði í höfuð mannsins af miklu afli þar sem hann lá og reyndi að reisa sig upp. Brotaþolinn hlaut um 5 cm langt sár á hægri augabrún, sem náði inn að beini, auk mars á sama stað, 1,5 cm langan skurð neðan við hægra auga, mar á vinstra gagnauga og olnboga, eymsli yfir brjóstkassa, auk þess sem tvær framtennur brotnuðu.
Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar.
Sá sem varð fyrir síðastnefndu árásinni krefst miskabóta upp á 1,5 milljónir króna. Auk þess kerir hann kröfu um að árásarmaðurinn greiði honum sjúkrakostnað upp á 167 þúsund krónur. Í þriðja lagi gerir hann kröfur um þjáningarbætur upp á tæplega 630 þúsund krónur. Krafan er því upp á um 2,4 milljónir króna.
Málið verður tekið fyrir í Héraðsdómi Reykjavíkur á næstunni.
