Gabríel Ólafsson er tuttugu og fjögurra ára gamall tónlistarmaður og tónskáld sem á örstuttum tíma hefur náð fádæma árangri í útgáfu og ekki bara það því hann rekur hljóðver í Hörpu þar sem heimsfrægir framleiðendur og fyrirtæki kaupa þjónustu á forsendum gæða og tæknilegs forskots.
Um síðustu helgi var hann í hljóðverinu með fulltrúa EA games, stærsta tölvuleikjaframleiðanda í heimi, að taka upp tónlist fyrir nýjan STAR WARS leik. Gabríel er gestur Einars Bárðarsonar í nýjasta þættinum af Einmitt, hlaðvarpsþætti Einars.
Gabríel skrifaði undir fyrsta útgáfusamning sinn aðeins nítján ára gamall en það var við One Little Indian í Bretlandi. Félagið heitir reyndar í dag One Little Independent en stjórnandi þess Derek Birkett er Íslendingum að góðu kunnur. Hann býr hér að hluta og saga útgáfunnar og Sykurmolanna og Bjarkar eru samofin. Nú er Gabríel kominn á samning við Decca Records, sem er í eigu útgáfurisans Universal Music Group. “Derek er góður maður og þegar Decca vildi kaupa upp samninginn minn þá vildi hann ekki standa í vegi fyrir því og hjálpaði mér að gera það að veruleika,” segir Gabríel.
Gabríel ræðir við Einar um viðburðaríkan feril sinn en þrátt fyrir ungan aldur er Gabríel fyrsti Íslendingurinn sem gefur út verk undir merkjum Decca Records en frá árinu 1928 hafa þekktustu tónlistarmenn sögunnar á sviði klassískrar tónlistar og djass gefið út plötur sínar á vegum þess. Fyrsta plata Gabríels sem nefnist Absent Minded hefur verið spiluð yfir 50 milljón sinnum á streymisveitum. Önnur plata Gabríels, Solon Islandus, er innblásin af verkum Davíðs Stefánssonar, kom svo út í fyrra og toppaði þá fyrstu. Nýjasta platan hans kom svo út í sumar og heitir Lullabies for Piano and Cello. Hún er byggð á íslenskum vögguvísum og er markaðssett og seld um allan heim. Þannig má segja að Gabríel vinni með íslenska menningar arfleifð og sé að kynna hana um allan heim með nýrri miðlun.
En þrátt fyrir að vera upptekinn við tónsmíðar og útgáfu undir merkjum Decca er Gabríel á kafi í rekstri á sinfóníuhljómsveit og nýju hljóðveri sem Gabríel og faðir hans stofnuðu fyrir um ári síðan. Reykjavik Orkestra RRO er rekið í Hörpu og á þessum stutta tíma hefur RRO unnið verkefni fyrir Apple TV, Netflix, Amazon, Decca og Deutsche Grammophon auk til að mynda íslensku kvikmyndarinnar Svars við bréfi Helgu. Þá tóku þeir einnig upp tónlist fyrir Hans Zimmer fyrir Frozen Planet 2 á vegum BBC og David Attenborough.
Gabríel og Einar ræða þennan stutta og afskaplega litríka og farsæla feril, áskoranirnar og valkostina sem Gabríel hefur staðið frammi fyrir. Gabríel er að uppskera núna en allan sinn feril hefur hann litið á vegferðina sem sprotaverkefni sem hann fjárfesti í, í þeirri von að lifa á tónlistinni í framtíðinni. Hægt er að hlusta á þáttinn í heild sinni hér.
