Óhætt er að fullyrða að samfélag lögfræðinga hér á landi nötri eftir fregnir af meintri líkamsárás hæstarréttarlögmanns. Sá er í eigendahópi einnar stærstu og öflugustu lögmannsstofu landsins, þar sem um 50 manns starfa, og hefur verið einn þekktasti lögmaður atvinnulífsins. Var hann meðal annars afar áberandi í ýmsum málum sem tengdust hruninu og uppgjöri þeirra. Fékk hann meðal annars í sinn hlut svimandi upphæðir úr tiltekinni slitastjórn fallins banka. Þá hefur lögmaðurinn setið í ábyrgðarstöðu fyrir Lögmannafélag Íslands.
Hann á nú yfir höfði sér kæru vegna alvarlegrar líkamsárásar og verði hann fundinn sekur er leyfi hans sem lögfræðings í uppnámi.
Forsaga málsins er sú að lögmaðurinn, sem er giftur fjölskyldumaður, er sagður hafa átt vingott við kvenkyns lögfræðing sem einnig er í eigendahópi stofunnar öflugu. Það hafi kvisast út til eiginmanns hennar, verslunareiganda í miðborg Reykjavíkur, með tilheyrandi flækju.
Herma heimildir DV að eiginmaðurinn hafi meðal annars mætt á lögfræðistofuna með samskipti lögfræðinganna í hönd og valdið þar nokkrum usla.
Það leiddi svo til uppgjörs í verslun eiginmannsins í miðbænum á miðvikudag. Mannlíf greindi frá því í morgun að eiginmaðurinn svikni hefði hlotið blóðuga áverka á nefi, brákuð rifbein og áverka á hálsi en í fyrri frétt var því haldið fram að maðurinn hefði nefbrotnað. Hann leitaði á bráðadeildar í kjölfar árásarinnar en vitni voru að árásinni sem skökkuðu leikinn.
Eins og áður hefur komið fram heldur lögmaðurinn því fram að eiginmaðurinn hafi ógnað sér með hníf og hann því brugðist við í sjálfsvörn. Hermt er að vitni deili ekki þeirri upplifun lögmannsins og lögregla hafi ekki fundið hníf á vettvangi þrátt fyrir leit.
