Maður sem nýtur nafnleyndar Héraðssaksóknara hefur verið ákærður fyrir gífurlegan fjölda brota sem sögð eru hafa verið framin á árinu 2021.
Í fyrsta kafla ákærunnar er maðurinn sakaður um samtals sex brot gegn fjölda fangavarða og áttu brotin sér annaðhvort stað á Litla-Hrauni eða Fangelsinu Hólmsheiði.
Hann er meðal annars sakaður um að hafa hótað tveimur fangavörðum að hella yfir þá þvagi og troða upp í þá saur. Ennfremur hótaði hann tveimur fangavörðum að berja þá og stinga með vopnum sem hann hafði útbúið sér úr járni af brotnum vaski.
Hann er ennfremur sakaður um að hafa hótað fjölda fangavarða lífláti og að hafa slegið einn með krepptum hnefa í vinstra gagnauga.
Krafist er upptöku á tveimur heimagerðum stunguvopnum úr fórum mannsins.
Í öðrum kafla ákærunnar er hann sakaður um mörg brot í nánu sambandi gegn fyrrverandi sambúðarkonu sinni, fyrst og fremst með hótunum um ofbeldi og líflát.
Maðurinn er sakaður um stórfelld eignaspjöll í sameign húss þar sem hann sló ítrekað pottum og pönnum í ýmsa muni, með þeim afleiðingum að örbylgjuofn féll í gólfið, skúffur og skápahurðir brotnuðu af og auk þess braut hann eftirlitsmyndavél með því að slá potti í hana.
Hann er einnig sakaður um að hafa skemmt snjallsíma fyrir manni og brotið DVD-spilara.
Þá er hann sakaður um að hafa við annað tækifæri eyðilagt eftirlitsmyndavél og framið ýmis skemmdarverk í sameign húseignar, sérstaklega á innréttingum, skápum og skúffum.
Fyrir hönd konu einnar er krafist skaðabóta af manninum, væntanlega fyrir skemmdarverk, upp á 830 þúsund krónur.
Fyrir hönd fyrrverandi sambýliskonu hans er krafist miskabóta upp á 1,5 milljónir króna.
Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar.
Málið var þingfest við Héraðdsóm Reykjavíkur þann 17. október.
