Það hefur ekki farið framhjá mörgum að söngkonan Britney Spears er að gefa út ævisögu sína. Bókin er ekki einu sinni komin út en nú þegar hafa fjölmiðlar fjallað um hverja bombuna á eftir annarri úr bókinni. Til dæmis um þungarrof sem Britney fór í þegar hún var á föstu með söngvaranum Justin Timberlake, hvers konar fíkniefni voru í uppáhaldi hjá henni þegar hún djammaði sem mest, og hvað vakti fyrir henni á þeim tíma sem hún var sjálfræðissvipt.
Þegar Britney var komin upp á stjörnuhimininn var hún í einu frægasta ástarsambandi heimsins á þeim tíma. Hún var á föstu með hjartaknúsaranum Justin Timberlake sem var að gera það gott með drengjasveitinni Nsync. Öllum fannst svo viðeigandi að stórstjörnurnar væru að stinga saman nefjum að ekki var laust við að heimurinn hreinlega legðist í bólið og gréti þegar tilkynnt var um sambandsslitin.
Britney opnar sig um sambandið í bókinni en þar segir hún að Justin hafi sagt henni upp í sms-i. Hún varð eyðilögð og íhugaði hreinlega að segja skilið við stjörnulífið fyrir fullt og allt.
Þær sögusagnir hafa gengið síðan að Britney hafi verið Justin ótrú með danshöfundinum Wade Robson. Eitt frægasta lag Justin, Cry me a river, virtist gefa þeim sögusögnum byr undir báða vængi.
Britney segir í bókinni að myndbandið við lagið hafi komið illa við hana. Þar hafi Justin viljandi fengið leikkonu sem líktist henni, og skýrt tekið fram að þessi þykjustu Britney væri ótrú. Í kjölfarið hafi álit almennings á söngkonunni tekið stakkaskiptum. Hún væri drusla sem hefði brotið hjarta gulldrengsins. Britney segir að hún hafi vissulega kysst dansarann, en hún hafi gert það til að hefna sín eftir að heyra sögur af meintu framhjáhaldi Justin.
Hún hafi í kjölfarið verið þvinguð í frægt viðtal þar sem hún var yfirheyrð um hvers vegna hún hafi valdið hjartaknúsaranum svona gífurlegum sársauka. Það hafi verið faðir Britney og umboðsmaður sem þvinguðu hana í viðtalið en í því hafi hún komist á endastöð.
„Mér fannst ég notuð, eins og ég hafi viljandi verið sett í svona stöðu fyrir framan allan heiminn.“
