„Ég bjóst alveg við þessu. Þetta er fylgifiskur þess þegar ruslageymslur eru ekki þrifnar reglulega og fylgifiskur lífræns úrgangs,“ segir Steinar en hann var í þann mund að fara skjóta rottu sem hafði komið sér fyrir inni í eldhúsinnréttingu á heimili einu í Vesturbænum þegar DV náði tali af honum í dag.
Er nóg af þeim núna? Rottunum?
„Það hefur aðeins dregið úr því en það var slatti af þessu í september og ágúst. En það er náttúrulega alltaf slatti af þeim.“
DV lék forvitni á að vita hvort útköllum í heimahús og ruslageymslur hefði fjölgað eftir að nýtt flokkunarkerfi sorphirðu var tekið í gagnið. Nú þarf til dæmis að safna matarleifum í þar til gerðan pappírspoka og er pokanum svo hent ofan í sérstakt hólf í tunnunum.
Ýmsir hafa kvartað undan því að flugur séu meira áberandi í heimahúsum en áður og þá hefur DV heyrt sögur af miður skemmtilegri aðkomu í ruslageymslum á höfuðborgarsvæðinu, þar sem maðkar og jafnvel kakkalakkar hafa komið sér vel fyrir.
„Ruslageymslur í fjölbýlishúsum eru alltaf í vandamálum með þetta. Ég hef séð tunnur hvítar af maðki, alveg hvítar að innan,“ segir Steinar Smári sem tekur fram að vandamálið sé einnig bundið við híbýli fólks. Mikilvægt sé að henda lífræna ruslinu út reglulega, helst á hverjum degi, og safna ekki dósum og flöskum sem innihéldu sykraða drykki eða bjór inni í eldhúsi.
„Það tekur eggið ekki nema fimm daga að klekjast út og þá kemur bara árás. Þannig að ef það kemur ein og hún verpir í svona flösku og flaskan fær að standa lengur en í fimm daga þá klekjast eggin út. Þá er gott að vera búið að henda flöskunum út fyrir hús eða fara með þær í flokkun,“ segir Steinar sem segir að útköllum vegna þessa vandamáls hafi fækkað að undanförnu enda farið að kólna í veðri. Samt sem áður komi tilvik sem þessi upp allt árið.
Steinar segir að útköllum vegna kakkalakka hafi fjölgað mikið á síðustu árum. DV heyrði af einu slíku dæmi í ónefndu hverfi á höfuðborgarsvæðinu þar sem allt var morandi í kakkalökkum í ruslageymslunni.
„Það er nokkuð oft sem það gerist og það gerist miklu oftar en áður. Ég myndi segja að þeir væru orðnir partur af lífríkinu, þannig lagað,“ segir Steinar sem fær reglulega símtöl út af kakkalökkum.
„Þetta er ekki bundið við ákveðin svæði. Kakkalakkanum er alveg sama hvar hann er,“ segir Steinar og bætir við að ef hann kemur í heimsókn og lítið er um að vera; allur matur í lokuðum hirslum og ekkert óhreint leirtau í vaskinum sé hann fljótur að láta sig hverfa.
„Ef það er allt „spikk og span“ þá húkkar hann sér bara far með næstu manneskju eða í næstu íbúð. En ef það er brotalöm á þessu þá getur hann sest að,“ segir Steinar að lokum.
