Það stefnir í að Jadon Sancho yfirgefi Manchester United í janúar eftir ósætti við stjórann Erik ten Hag. Miðað við nýjustu fréttir gæti Englendingurinn ungi endað á Ítalíu.
Sancho hefur ekki spilað með United síðan í ágúst eftir opinbert ósætti við Ten Hag. Hann hefur æft einn undanfarið og fær ekki að snúa aftur nema hann biðjist afsökunar á færslu á samfélagsmiðlum þar sem hann svaraði hollenska stjóranum eftir ummæli hans í kjölfars taps gegn Arsenal.
Það er því útlit fyrir að Sancho haldi annað í janúar. Hafa félög eins og Barcelona og Dortmund verið nefnd til sögunnar.
Nú segir spænski miðillinn AS hins vegar að Juventus fylgist grannt með Sancho og að ítalski risinn leiði meira að segja kapphlaupið um hann. Yrðu það ansi áhugaverð félagaskipti.
Þó segja miðlar á Ítalíu að fyrsta val Sancho yrði að fara til Dortmund, en þaðan kom hann til United sumarið 2021.
