Stórleikarinn Sam Neil, sem gerði meðal annars garðinn frægan í stórmyndinni Jurassic Park, glímir við sjaldgæft blóðkrabbamein sem er ólæknandi. Leikarinn, sem er 76 ára gamall, greinir frá því í viðtali við ástralska miðilinn Australian Story að lyfjameðferð hafi ekki borið árangur. Hann var settur á bælandi lyf í kjölfarið en fljótlega muni þau hætta að virka.

„Ég er undirbúinn undir það,“ segir stórleikarinn og segir dauðann vera pirrandi tilhugsun en eitthvað sem hann óttist þó alls ekki. Hann vilji alls ekki að fólk sé of upptekið af veikindum hans. „Ég hef svo lítinn áhuga á krabbameinu sjálfur. Ég hef bara áhuga á að lifa.“

Neil, sem er frá Nýja Sjálandi, segir að krabbameinsmeðferðirnar hafi tekið verulega á. „Mér leið eins og ég væri búinn með tíu lotur gegn hnefaleikakappa,“ sagði leikarinn sem heldur ótrauður áfram að leika þrátt fyrir veikindin. Hann segir að vinnan veiti sér einfaldlega svo mikla gleði að það að setjast í helgan stein komi ekki til greina.

„Ég get ekki lýst þeim forréttindum sem það er eyða tíma með öllum þessum leikurum, sem ég kann afar vel og ber svo mikla virðingu fyrir,“ segir Neil.

Hann vinnur nú að bók um ferilinn sem ber vinnuheitið „Did I ever tell you this?“ þar sem hann rifjar upp persónulegar sögur frá ferlinum. Segir hann að tilgangur bókarinnar sé að skilja eftir hluta af sjálfum sér fyrir börn sín og barnabörn.