Age Hareide, landsliðsþjálfari Íslands gefur það ekki upp hvort Aron Einar Gunnarsson verði í byrjunarliðinu gegn Liechtenstein á morgun.

Aron Einar sat fyrir svörum á fréttamannafundi með Hareide í dag sem bendir til þess að hann geti spilað sinn fyrsta fótboltaleik í marga mánuði. Aron hefur verið meiddur hjá Al-Arabi í katar.

„Þið fáið liðið á morgun, hann er klár. Hann hefur æft með okkur, það eru allir heilir heilsu og geta spilað. Þið fáið byrjunarliðið á morgun,“ sagði Hareide þegar hann var spurður hvort Aron yrði með frá byrjunar.

Íslenska liðið fékk urmul færa gegn Lúxemborg á föstudag en missti leikinn niður í 1-1 jafntefli.

„Það er pirrandi að vera þjálfari stundum, þú ert ánægður með þegar allt er að virka sem við æfðum dagana fyrir leikinn. Liðið spilaði vel og leikmenn gerðu vel, þeir skora mark og við hættum að spila okkar leik. Við höfum skoðað leikinn, við erum með allar myndir og myndbönd af leiknum. Við vorum ekki í réttum stöðum í uppspili og hættum að spila eins og í fyrri hálfleik,“ segir Hareide.

Hareide ætlar að spila á sínu sterkasta mögulega liði í næstu leikjum í von um að allt verði í lagi ef Ísland kemst í umspil í mars um laust sæti á Evrópumótinu.

„Við ættum ekki að reyna neitt, við eigum að spila okkar besta liði og reyna að bæta okkur leik frá leik. Við eigum þrjá leiki eftir. Við verðum að spila okkar sterkasta liði, það er mikilvægt að koma Aroni og Gylfa inn fyrir leiki í mars. Það er mikilvægt fyrir unga leikmennina, hafa hermann eins og Aron. Ungu leikmennirnir hafa mikil orku,“ segir Hareide.

„Við verðum að nýta dagana vel til að koma saman rétta liðinu, þetta hefur verið gott en við verðum að vera harðari í þessu.“

Ísland hefur í undanförnum leikjum fengið mörg færi en ekki nýtt þá, Hareide vill ekki vera of harður við unga leikmenn liðsins.

„Við verðum að vera rólegir að setja ekki pressuna á ungu leikmennina, ég er ánægður með að geta spilað svona og skapað færið. Eitt af því erfiðasta í fótbolta er að skora, ég er ánægður með að Orri skoraði og hann er að koma upp. Alfreð er markaskorari, Gylfi er að koma til baka og er markaskorari. Það gefur mer von fyrir framtíðina, við erum með fleiri leikmenn sem geta skorað.“

„Við klárum ekki færin nogu vel, við eigum ekki að vera hræddir við að vinna 1-0. Við eigum að geta unnið 1-0, við verðum að verja markið betur.“