Jökull Elísabetarson hefur skrifað undir nýjan samning við Stjörnuna sem gildir til ársins 2027.

Þetta staðfesti félagið í dag en Jökull hefur undanfarin tvö ár unnið í Garðabænum og er í dag aðalþjálfari.

Hann tók við sem aðalþjálfari á nýliðnu tímabili en hafði áður verið aðstoðarmaður Ágústs Gylfasonar.

Jökull gerði frábæra hluti eftir að hafa tekið við og fær nú verðlaun fyrir vel unnin störf.

Tilkynning Stjörnunnar:

Það eru heldur betur gleðitíðindi hér á bæ, en Stjarnan og Jökull hafa komist að samkomulagi um að framlengja samningi hans til ársins 2027!

Jökull hóf störf hjá Stjörnunni sem aðstoðarþjálfari árið 2021 en tók við keflinu í maí á þessu ári. Liðið náði frábærum árangri í sumar sem skilaði sér í Evrópusæti á næsta ári, geggjaðri stemmningu í stúkunni og í kringum liðið.

“Ég er þakklátur og spenntur að skrifa undir nýjan samning við Stjörnuna! Við erum að koma úr flottu tímabili en nú þurfum við að gera betur og gera meira og ég hlakka mikið til að byrja undirbúningstímabil þar sem við munum leggja enn meira á okkur en við höfum áður gert” segir Jökull, þjálfari meistaraflokks karla.

“Það er ánægjulegt fyrir okkur sem félag að framlengja enn lengri samning við Jökul eða út keppnistímabilið 2027. Samstarf okkar hefur gengið vel frá fyrsta degi og við erum bara rétt að byrja í því sem við ætlum okkur og þurfum að halda vel á spilunum í þeirri vinnu sem er framundan. Það er ljóst að árangurinn síðastliðið tímabil hefur vakið athygli en nú er það að
baki og við ætlum okkur að leggja enn harðar að okkur við að ná lengra og til þess þurfa allir að leggja enn meira á sig og það verður gaman að fylgjast með þeirri vinnu undir stjórn Jökuls” Segir Helgi Hrannarr Jónsson formaður mfl ráðs karla.