Þann 3. október síðastliðinn sakfelldi Héraðsdómur Reykjavík Daníel Sigurðsson fyrir skattalagabrot í rekstri fyrirtækis hans Geri allt slf.
Daníel var sakaður um að hafa staðið skil á röngum virðisaukaskattskýrslum félagsins fyrir árin 2015 til 2017. Vanframtalinn útskattur fyrir tímabilin var sagður nema samtals rétt tæplega einni milljón króna og offramtalinn innskattur rúmlega 5,3 milljónum.
Hann var auk þess sakaður um að hafa staðið skil á efnislega röngum skattframtölum fyrir Geri allt fyrir rekstrarárin 2014 og 2015. Nemur vanframtalinn tekjuskattur rúmlega 2,6 milljónum króna.
Fyrir sama tímabil var hann sakaður um virðisaukaskattsvik upp á tæplega 1,7 milljónir.
Lögmaður Daníels benti á fyrir dómi að málið hefði dregist úr hófi. Dómari tók undir það og tók mið af því við ákvörðun refsingar.
Var Daníel dæmdur í sex mánaða skilorðsbundið fangelsi og til greiðslu sektar upp á 21,2 milljónir króna. Verði sektin ekki greidd innan fjögurra vikna frá birtingu dómsins skal Daníel sæta 300 daga fangelsi.
Samkvæmt heimildum DV mun Daníel áfrýja dómnum til Landsréttar.
Dóminn má lesa hér.
Daníel Sigurðsson og fyrirtæki hans, Geri allt, hafa áður komið við sögu í dómskerfinu en árið 2020 var kveðinn upp dómur í einkamáli sem félagið Nýhugsun höfðaði á hendur Daníel og Geri allt vegna ógreidds reiknings fyrir leigu á veislutjaldi.
Geri allt og Daníel voru þá dæmd til að greiða Nýhugsun 185.000 krónur vegna hins ógreidda reiknings en Nýhugsun hafði sett upp veislutjald fyrir brúðkaupsveislu í júlí árið 2018.
Samkvæmt tölvupóstasamskiptum á milli Daníels og Nýhugsunar sem birtast í dómnum kemur fram að samið hafði verið um leigu á 45 fermetra tjaldi. Leigan á tjaldinu átti að vera 30 þúsund krónur, en uppsetningin á því 155 þúsund krónur, fyrir virðisaukaskatt.
Umrædd brúðkaupsveisla var haldin við Kleifarvatn og átti að innihalda innkomu Daníels á þyrlu. Veislan virðist þó hafa farið úrskeiðis. Í dómnum segir að tjaldið hafi verið of lítið og vegna rigningar hafi rétt náðst að halda athöfnina áður en gestirnir fóru í bæinn á pizzastað.
„Gestir hafi brunað í bæinn og farið á staðinn Shake and Pizza í bjór og pitsu, en það hafi verið eini staðurinn sem hafi getað tekið við öllum þessum fjölda gesta með þessum fyrirvara.“
Eftir brúðkaupið sendi stefnandi málsins og forsvarsmaður Nýhugsunar reikning á Geri allt slf. sem nam 184. 573 krónur fyrir virðisaukaskatt. Daníel sendi í kjölfarið kvörtun vegna reikningsins í tölvupósti. Hann sagði að tilboðið hafi átt við stærra tjald með álgrind, en hann hafi fengið minna uppblásið tjald, sem ætti að hafa verið ódýrara, samkvæmt fyrri tölvupóstsamskiptum.
Forsvarsmaður Nýhugsunar mótmælti staðhæfingu Daníels, hann sagði að hann hafi fengið minna tjaldið á betra verði, eða 184. 573 króna í stað 192.000 króna. Hann sagði einnig að tímagjald á uppsetningu hafi verið meira vegna lélegra aðstæðna. Daníel svaraði því, hann sagði að tímagjaldið ætti ekki að skipta neinu og heimtaði að reikningurinn yrði lagaður.
Þá sendi forsvarsmaður Nýhugsunar á Daníel að hann væri tilbúinn að fara með málið fyrir dómstóla, væri reikningurinn ekki greiddur, auk þess sem hann hélt því fram að hafa margsinnis verið varaður við því að vinna verk fyrir Daníel.
„Sæll Daníel, Þú fékkst ekki tilboð í minna tjaldið, þú fékkst aðeins þær upplýsingar að það væri á ,,betra verði“ sem það klárlega er. Það eru einu forsendurnar sem þú hafðir. Það kemur hvergi fram að Rent-A-Tent reikni verð út frá fermetra-fjölda og það höfum við aldrei gert. Ég er óhræddur við að reka þetta mál fyrir dómstólum, það er fín reynsla fyrir mig þar sem ég er lögfræðingur. Þú mátt ráðfæra þig við lögmanninn þinn um þá staðreynd að þú ert að láta félagið þitt greiða fyrir persónuleg útgjöld til þín. Ég geri ráð fyrir að þú vitir að það er ólöglegt og þér er ekki heimilt að nota reikninginn í bókhald félagsins. Þegar ég tilkynni þetta og þú þarft að greiða reikninginn persónulega þá má setja að upphæð reikningsins hækki í raun um 24%. Ég var ítrekaður varaður við að vinna þetta verk fyrir þig af aðilum sem þekkja til þín en ég trúði því ekki að þú myndir reyna að svíkja og pretta, sérstaklega þar sem verðið er það ódýrasta á landinu. Þú virðist vera jafn óheiðarlegur og ósvífinn og talað er um.“
Daníel og Geri allt slf. voru dæmd til að greiða reikninginn, sem var 184.574 krónur ásamt dráttarvöxtum, auk 350.000 krónur í málskostnað stefnanda. Í dómnum segir:
„Að mati dómsins verður hins vegar ekki séð á hvaða forsendum unnt sé að fallast á kröfu stefnanda um greiðslu dráttarvaxta frá 5. september 2018. Ágreiningslaust er í málinu að aðilar málsins sömdu aldrei um gjalddaga kröfu.“
