Héraðsdómur Reykjavíkur hefur birt fyrirkall gegn manni í Lögbirtingablaðinu og birt þar ákæru Héraðssaksóknara gegn honum. Maðurinn heitir Eliner Duro, fæddur 1995, og er frá Albaníu.
Eliner er ákærður fyrir samtals níu afbrot í Reykjavík á tímabilinu 22. apríl 2021 fram í janúar á þessu ári.
Hann er sakaður um að hafa haft í fórum sínum í herbergi í húsi á Snorrabraut 57 stykki af MDMA, 108 g af maríhúana og 13 g af amfetamíni. Efnin voru ætluð til söludreifingar. Nokkrum dögum síðar var hann tekinn í herbergi í Bergstaðastræti með nokkuð minna af fíkniefnum í fórum sínum, en þau voru líka ætluð til söludreifingar.
Maðurinn er síðan sakaður um nokkur önnur brot, flest fíkniefnatengd en einnig eftirtalin brot á útlendingalögum:
„Útlendingalagabrot með því að hafa, á tímabilinu 26. apríl 2021 til 22. desember 2022, ítrekað brotið gegn skyldu sinni til að tilkynna sig á lögreglustöðina við Hverfisgötu 113 í Reykjavík samkvæmt ákvörðunum lögreglustjórans á höfuðborgarsvæðinu, dags. 26. apríl 2021, 2. janúar 2022 og 23. nóvember 2022, birtum ákærða greinda daga.“
„Útlendingalagabrot með því að hafa, á tímabilinu 27. september 2020 til 6. janúar 2023, dvalið í heimildarleysi hér á landi án dvalarleyfis, en ákærði fór huldu höfði hér á landi í kjölfar ákvörðunar Útlendingastofnunar 16. júní 2021, þar sem honum var tilkynnt um brottvísun og endurkomubann fyrir ólögmæta dvöl hér á landi.“
Maðurinn hefur nú verið opinberlega kvaddur fyrir dóm, til að „hlýða á ákæru, halda uppi vörnum og sæta dómi. Sæki ákærði ekki þing má hann búast við því að fjarvist hans verði metin til jafns við það að hann viðurkenni að hafa framið brot það sem hann er ákærður fyrir og dómur verði lagður að honum fjarstöddum.“
Málið verður tekið fyrir í Héraðsdómi Reykjavíkur þann 23. nóvember.
