Auðug hjón í Bretlandi halda því fram að frændi annars þeirra sem þau kalla „djöfullegt skítseiði“ (e. devious little sod) hafi stolið húsi þeirra, sem er staðsett í hinu ríkmannlega hverfi South Kensington í London og metið á fjórar milljónir sterlingspunda ( tæplega 680 milljónir íslenskra króna).
Hjónin heita Michael Lee, sem er 79 ára, og King-Su Huang sem er 73 ára. Þau lögsóttu frænda hinnar síðarnefndu, Cheng-Jen Ku, sem er 40 ára gamall. Hjónin, sem eru vellauðug, keyptu húsið árið 2004 en segjast hafa skráð það á Cheng sem hafi verið þeim mjög náinn. Þetta segjast þau hafa gert til að leyna því hversu auðug þau eru. Cheng fullyrti hins vegar fyrir dómi að hann ætti húsið.
Cheng hafði búið hjá hjónunum í húsinu en yfirgaf það þar sem hann sagðist vera orðinn leiður á þeim ströngu húsreglum sem hann þurfti að fara eftir. Dómarinn vísaði til þessarar staðreyndar þegar hann dæmdi hjónunum í vil.
Cheng bjó hjá hjónunum í húsinu sem þau áttu á undan húsinu sem deilt var um fyrir dómi eftir að hann flutti til Bretlands frá Taívan og sagði fyrir dómnum að í samræmi við hefðir í síðarnefnda landinu hefði ríka frænka hans gefið honum húsið. Hjónin og aðrir fjölskyldumeðlimir sem komu fyrir dóminn lýstu honum hins vegar sem „djöfullegu skítseiði.“
Dómarinn í málinu sagði hins vegar að fyrst að Cheng yfirgaf heimilið svo hann þyrfti ekki að hlýða húsreglunum hefði hann ekki hegðað sér eins og hann ætti húsið.
Frænka Cheng sagði fyrir dómi að þau hefðu gert samkomulag um að húsið skyldi skráð á hann og hún hefði talið það byggt á gagnkvæmu trausti. Cheng fullyrti að ekkert slíkt samkomulag hefði verið gert og að frænka hans hefði gefið honum húsið.
Dómarinn komst hins vegar að þeirri niðurstöðu að ef eign væri skráð á annan einstakling en greiddi fyrir hana gæfi það til kynna samkomulag um að greiðandinn hefði hin raunveruleg yfirráð yfir eigninni nema mögulegt væri að sýna fram á að um gjöf eða lán væri að ræða.
Ótvírætt væri að hjónin hefðu keypt eignina og gert samkomulag við Cheng um að eignin skyldi skráð á hann en ætlunin væri að þau yrðu hinir raunverulegu eigendur. Í gögnum málsins kæmi fram að hann hefði ekki sagt að húsið væri gjöf til sín.
Húsið sjálft var byggt á sjöunda áratug 19. aldar og er meðal annars í göngufæri frá tónleikahöllinni heimsfrægu Royal Albert Hall.
Þegar hjónin keyptu húsið greiddu þau fyrir það 1,57 milljónir punda ( tæpar 267 milljónir íslenskra króna á gengi dagsins í dag). Virði þess hefur því meira en tvöfaldast. Þau afhentu Cheng féð til að kaupa húsið í hans nafni. Fyrir dómi sagði Michael Lee að þetta hefðu þau gert til að standa vörð um einkalíf sitt og til að koma í veg fyrir að krafist yrði þess að húsið væri sett að veði vegna lána sem þau tækju vegna viðskipta sinna. Það væri þvæla að þau hefðu gefið Cheng húsið.
Lee, sem hefur þekkt Cheng síðan hann var barn, sagði þennan frænda konu sinnar hafa orðið grimmari og viðskotaverri á fullorðinsárum.
Dómarinn dæmdi hjónunum í vil og Cheng þarf þar að auki að greiða allan málskostnað.
Það var Mirror sem greindi frá.
