Morgunblaðið segist hafa heimildir fyrir að á fundinum verði rætt um þá málaflokka sem hafa verið til umfjöllunar hjá starfshópum ríkisstjórnarinnar síðustu tvo daga. Í starfshópunum eru þingflokksformenn stjórnarflokkanna og aðstoðarmenn ráðherra.
Aðaláherslan hefur verið að ræða það sem ber á milli í útlendingamálum og orkumálum. Á fundinum í dag munu þingmenn meðal annars ræða stöðu efnahagsmála, aðgerðir til að ráða niðurlögum verðbólgunnar og húsnæðismál að því er Morgunblaðið segir.
Varðandi ráðherrakapalinn segir Morgunblaðið að flestir þeir þingmanna Sjálfstæðisflokksins, sem blaðið hefur rætt við, séu þeirrar skoðunar að líklega fari Bjarni Benediktsson í utanríkisráðuneytið og Þórdís Kolbrún Reykfjörð Gylfadóttir taki við efnahags- og fjármálaráðuneytinu.
Ef Bjarni tekur ekki við ráðherraembætti að sinni kallar það á breytingar á ráðherrahópi Sjálfstæðisflokksins og hugslega þarf að stokka upp skiptingu ráðuneyta á milli stjórnarflokkanna.
