Í byrjun næsta árs stendur til að senda alræmda afríska lögreglusveit til Haítí til að koma á lögum og reglu þar en þar hafa glæpagengi breytt landinu í hreinan vígvöll. Það eru Bandaríkin sem greiða kostnaðinn við verkefnið en lögreglusveitin er frá Kenía.

Öryggisráð SÞ samþykkti nýlega að senda alþjóðlegt lið undir forystu Kenía til Haítí til að ná tökum á ástandinu í landinu.

En verkefnið mætir nú þegar andstöðu í Kenía og Haíti og er ekki einu sinni byrjað. Ástæðan er að keníska lögreglan er þekkt fyrir hrottaskap og nú síðast í sumar létust að minnsta kosti 23 og mörg hundruð særðust í átökum á milli lögreglunnar og fólks sem mótmælti hækkandi vöruverði.

Mannréttindasamtök á borð við Amnesty International hafa því áhyggjur af fyrirætlunum um að senda keníska lögreglumenn til Haítí.

SÞ lýstu yfir áhyggjum í sumar vegna framgöngu lögreglunnar á Haítí en samt sem áður samþykkti öryggisráðið að senda 1.000 keníska lögreglumenn til landsins.

Ariel Henry, forseti landsins, hefur í eitt ár grátbeðið alþjóðasamfélagið um hjálp. Þungvopnuð glæpagengi fara nú með völdin í um 80% landsins en þar búa um 11 milljónir. Rán, gripdeildir, fjárkúganir, morð, mannráns og nauðganir eru hversdagslegir hlutir og 10.000 manna lögreglulið landsins ræður ekki við neitt. Glæpagengin berjast um  yfirráðin á fíkniefnamarkaðnum, vopnasölu og vændi.