Í tengslum við alþjóðlegan dag raftækjaúrgangs 14. október stendur ELKO fyrir sérstöku átaki til að auka skil á raftækjum til endurvinnslu og að lengja líftíma þeirra. Þá er blásið til vinningsleiks fyrir skil á raftækjum auk þess sem heitið er á tæknideild Fjölsmiðjunnar náist að safna yfir 100 kílóum af snúrum í verslunum ELKO.
Samtökin Weee Forum stofnuðu til alþjóðlegs dags raftækjaúrgangs (e. International e-waste day) árið 2018. Að samtökunum standa yfir 50 fyrirtæki í 33 löndum sem taka á móti raftækjaúrgangi. Markmið átaksins er að vekja athygli á þeim áskorunum sem fylgja raftækjaúrgangi og hvetja fólk til að koma raftækjum í endurvinnslu. Yfirlýst slagorð samtakanna í ár er: „Hægt er að endurvinna allt sem er með kló, rafhlöðu eða snúru.“
Aðeins 34% raftækja skila sér í endurvinnslu
Í ár tekur ELKO fullan þátt í alþjóðlegum degi raftækjaúrgangs og birtir hagnýtar upplýsingar um endurvinnsluferlið. „ELKO hvetur alla landsmenn til að skila inn gömlum raftækjum sem komin eru á enda líftímans. Samkvæmt Úrvinnslusjóði skiluðu sér aðeins 34% raftækja í endurvinnslu hér á landi árið 2021. Sett markmið Úrvinnslusjóðs um söfnun er hins vegar 65%. Við þurfum öll að leggjast á árar til að hægt sé að endurnýta allt hráefnið í tækjunum. Á Íslandi er gjaldfrjálst að skila inn raftækjum. Nýtum okkur það og sýnum ábyrgð,“ segir Óttar Örn Sigurbergsson framkvæmdastjóri ELKO.
Kaupa notuð raftæki
Á alþjóðlegum degi raftækjaúrgangs eru viðskiptavinir hvattir til að koma með gömlu tækin í hringrásarferli ELKO „Fáðu eitthvað fyrir ekkert“ í verslunum fyrirtækisins. „ELKO kaupir notuð raftæki af viðskiptavinum og kemur í ábyrgt hringrásarferli í gegnum samstarfsaðila. Árið 2022 fór til dæmis 91% af Apple tölvum sem skilað var til ELKO í endurnotkun og 9% voru endurnýtt í hráefni. Ekkert fór í urðun,“ segir Óttar. Frá 12. til 29. október eiga allir sem skila tæki í „Fáðu eitthvað fyrir ekkert“ þess kost að vinna 100 þúsund króna gjafakort í ELKO.
Frá og með 14. október býður ELKO einnig fyrirtækjum upp á að kaupa af þeim gömul raftæki og koma í ábyrga endurvinnslu í gegnum fyrirtækjaþjónustu ELKO. „Það er sérstök ánægja að aðstoða fyrirtæki við að koma tækjum í hringrásarferli raftækja, en við bjóðumst til að kaupa notaðar fartölvur, borðtölvur, spjaldtölvur, farsíma og snjallúr. Tækin fara svo í úrvinnslu erlendis og inn í hringrásarhagkerfið,“ segir Óttar. Til að vera með geta fyrirtæki haft samband við fyrirtækjaþjónustu ELKO (b2b@elko.is) og fengið uppgefið áætlað verð fyrir raftækin.
ELKO tekur nú við snúrum til endurvinnslu
Síðustu ár hefur ELKO boðið upp á endurvinnsluskápa í öllum verslunum þar sem tekið er á móti smærri raftækjum, perum, rafhlöðum, blekhylkjum og fartölvum. Nú ætlar ELKO, í samstarfi við fyrirtækið Furu, einnig að taka á móti snúrum og köplum. Snúrurnar eru tættar í frumeindir hér á Íslandi og koparinn unninn úr þeim svo hægt sé að endurnýta hann. Jafnframt ætlar ELKO að gefa 500 þúsund krónur til tæknideildar Fjölsmiðjunnar náist að safna 100 kílóum af snúrum á tímabilinu, en Fjölsmiðjan rekur tæknideild þar sem gömul raftæki eru löguð og yfirfarin og stuðla þannig að hringrásarhagkerfi raftækja.
