Harry Maguire varnarmaður Manchester United segir frá því að hann ætli að fara frá félaginu í janúar ef hlutverk hans verður ekki stærra.

Maguire byrjaði síðasta deildarleik United vegna meiðsla í vörninni en iðulega situr hann á tréverkinu hjá Erik ten Hag.

Maguire var orðaður við West Ham í sumar en félagaskiptin gengu ekki í gegn.

„Ég mun ekki sitja allt mitt líf þarna og spila einu sinni í mánuði. Ef þetta heldur svona áfram þá mun ég setjast niður með félaginu og ræða málin,“ segir Maguire.

„Það er ekki mín ákvörðun hvort ég byrji næsta leik fyrir United eða ekki. Ég veit það ekki.“

„Ég hef trú á sjálfum mér en þetta hefur verið erfitt, ég vil spila leiki og vera mikilvægur fyrir leiki. Undanfarið hef ég ekki spilað nóg, það er staðreynd.“

Maguire segir að staðreyndin sé sú að þegar hann byrji leiki undir stjórn Ten Hag þá gangi United vel.

„Ég verð bara að taka þau tækifæri sem ég fæ. Tölfræði mín með þessum stjóra talar fyrir sig sjálf, sigurprósenta mín er rosalega góð. Ef þú skoðar síðustu 15-20 leiki með félagsliði og landsliði þá er ég sáttur með frammistöðuna.“