Stjórnendur Síðuskóla á Akureyri svara því ekki hvort grunnskólakennarinn Helga Dögg Sverrisdóttir hafi fengið áminningu vegna skrifa sinna um transfólk. Heldur ekki hvort að nemendum við skólann verði gert skylt að mæta í tíma til hennar.
Skrif Helgu Daggar hafa verið fordæmd, meðal annars af Kennarasambandinu, Samtökunum 78, og foreldrum trans barns við skólann. Þann 5. október var lögum Bandalags kennara á Norðausturlandi breytt til þess að geta komið Helgu Dögg úr sæti formanns. Það er að kjörtímabil formanns var stytt úr tveimur árum í eitt ár.
Helga Dögg hefur farið mikinn í skrifum sínum um trans fólk. Meðal annars hefur hún skrifað:
„Sérúrræði fyrir trans fólk á að vera skylda, ekki val í sundlaugum og einkarýmum kynjanna. Við eigum ekki að bjóða fólki upp á að baða sig með ókunnugum af gagnstæða kyninu, þó það skilgreini sig trans. Það er ekki boðlegt. Hvað þá ungum börnum.“
Nýlega skrifaði hún einnig greinina „Áróðurinn að trans-kona sé kona er lygi“ á vefinn frettin.is. Þar sem hún gerir orð Søs Lihn Nielsen að sínum:
,,Konur eru fullorðnar konur. Karlmenn eru fullorðnir mennskir karlmenn.“
,,Stelpa sem hefur gaman af íþróttum, er með stutt hár og finnst gaman að leika sér á vörubílum, hún er samt stelpa.“
,,Strákur getur klæðst bleiku og verið með sítt hár og leikið sér með dúkkur, hann er samt strákur.“
Bæjarstjórn Akureyrarbæjar hefur lagt orð í belg varðandi skrif Helgu Daggar þó nafn hennar sé ekki nefnt berum orðum. Segir í yfirlýsingu bæjarins frá því í vor þegar umræða kom upp um skrif Helgu Daggar:
„Að gefnu tilefni vill bæjarstjórn Akureyrar koma því skýrt á framfæri að í öllu því starfi sem sveitarfélagið hefur með höndum, er undantekningarlaust haft að leiðarljósi að tryggja jafnan rétt allra og fagna fjölbreytileikanum. Það eru grundvallarmannréttindi að allir njóti sama réttar óháð kyni, kynþætti, þjóðernisuppruna, trú, lífsskoðun, fötlun, starfsgetu, aldri, kynhneigð, kynvitund, kyneinkennum eða kyntjáningu,“
Bæjarfulltrúinn Hilda Jana Gísladóttir fagnaði einnig ákvörðun Bandalags kennara á Norðausturlandi í byrjun mánaðar. Skrifar hún á kaffid.is:
„Það hefur síðan óneitanlega haft áhrif að formaður Bandalags kennara á Norðurlandi eystra (BKNE) hefur nánast daglega, opinberlega, viðrað ógeðfelld viðhorf sín og annarra um málefni hinsegin fólks, sem hafa sérstaklega beinst gegn transfólki. Þau gleðilegu tíðindi bárust hins vegar í gær að formannskipti hafa orðið hjá félaginu.“
DV spurði Ólöfu Ingu Andrésdóttur, skólastjóra Síðuskóla, um stöðu Helgu Daggar. Hvort hún yrði áfram kennari við skólann, hvort hún hefði fengið áminningu í starfi fyrir skrif sín, börnum á hvaða aldri hún kennir, hvort skólinn hefði fengið kvartanir vegna hennar frá foreldrum eða öðrum kennurum og hvernig skólinn hefði brugðist við.
„Akureyrarbær svarar hvorki spurningum um einstaka starfsmenn bæjarins né hvort efnt hefur til starfsmannamáls,“ var eina svarið frá Ólöfu Ingu við þeim spurningum.
Einnig spurði DV Ólöfu hvort nemendum yrði skylt að mæta í tíma til Helgu Daggar. En eins og Morgunblaðið greindi frá í september munu nemendur við Fjölbrautaskólann í Garðabæ ekki þurfa að mæta í tíma hjá kennaranum Páli Vilhjálmssyni, sem hefur haft uppi svipuð ummæli og Helga Dögg um transfólk og meðal annar sakað Samtökin 78 um að vera í hópi með aðilum sem aðhyllist barnagirnd.
Kristinn Þorsteinsson, skólameistari við FG, sagði að Páli yrði ekki vikið úr starfi þó að skólinn væri í vandræðum vegna skrifa Páls. Nemendur myndu hins vegar ekki þurfa að mæta í tíma til hans ef þeir vildu það ekki.
Ólöf Inga svarar DV heldur ekki um hvort að foreldrum barna við Síðuskóla sé skylt að senda nemendur í tíma til hennar.
„Við munum ekki svara því heldur,“ segir hún.
