Dorothy Hoffner, 104 ára bandarísk kona, komst í fréttirnar í síðustu viku þegar hún fór í fallhlífarstökk. Með því vonaðist Dorothy til að fá viðurkenningu heimsmetabókar Guinness sem elsti fallhlífarstökkvari sögunnar.

Nú er Dorothy aftur komin í fréttirnar því hún lést á heimili sínu aðfaranótt mánudags, um viku eftir að hafa farið í stökkið. New York Times greinir frá.

Joe Conant, barnabarn Dorothy, greindi frá andláti hennar í gær. Segist hann hafa talað við hana síðastliðinn sunnudag og þá hafi allt virst vera í himnastandi og þau stefnt að því að borða saman fljótlega.

RÚV fjallaði meðal annars um stökkið hjá Dorothy og vakti fréttin athygli margra. Kolbrún Bergþórsdóttir, blaðamaður á Morgunblaðinu, minntist til dæmis á hana í sjónvarpspistli sínum í Morgunblaðinu síðastliðinn föstudag þar sem hún sagði meðal annars:

„Í sjónvarpsfréttatíma RÚV var á dögunum sýnt myndbrot af fallhlífarstökki 104 ára gamallar konu. Rætt var við hana eftir stökkið. Hún var sannarlega hin sprækasta og í fullu andlegu fjöri eins og er svo eftirsóknarvert að vera. Þetta var hin skemmtilegasta frétt og við mættum fá meira af þeim. Það gengur ekki að fréttatíminn sé kvöld eftir kvöld á þann veg að maður dragi teppi yfir höfuð og biðji Guð að hjálpa sér af því heimurinn sé svo vondur.“