Afrekalisti Arnold Schwarzenegger er langur. Þessi 76 ára leikari, fyrrum ríkisstjóri og vaxtaræktarmaður á langan og góðan feril að baki en eitt er það sem hann hefur ekki getað og mun aldrei geta og hefur nú loks sætt sig við.

Þetta er að verða forseti Bandaríkjanna. Hann hefur sjálfur tröllatrú á sér og hæfileikum sínum til að gegna embættinu.

Í samtali við sjónvarpsmanninn Howard Stern sagði Schwarzenegger að hann væri búinn að gefa þennan draum upp á bátinn. „Ég er viss um að ég yrði frábær forseti. Mér finnst ég hafa orkuna í það og viljann til að þjappa fólki saman,“ sagði hann.

Hann getur ekki orðið forseti því hann fæddist í Austurríki en eitt af skilyrðunum fyrir að geta boðið sig fram til forseta í Bandaríkjunum er að viðkomandi þarf að vera „innfæddur“ Bandaríkjamaður.

Ekki eru allir á eitt um hvernig á að túlka þetta ákvæði en samt sem áður hefur Schwarzenegger gefið drauminn upp á bátinn.

Stern sagði honum að hann „telji hann geta sigrað í forsetakosningum“ og tók Schwarzenegger undir það og sagði: „Þú hefur alveg rétt fyrir þér. Svo margir hafa sagt við mig: „Ég vildi óska að þú gætir orðið forsetinn okkar.““