Starfsmaður Heilbrigðiseftirlits Reykjavíkur fór á staðinn á Langholtsveg þar sem vinnuvélar hafa verið geymdar um þriggja mánaða skeið. Metið verður hvort tækin séu í geymslu og verður eiganda þá gert að fjarlæga þau.
DV fjallaði um málið á mánudag. En stórar vinnuvélar og trukkur pípulagnafyrirtækis hafa teppt bílastæði, bæði fyrir íbúum í þeim húsum sem keyptu pípulagningarverkið og nágrönnum. Greint var frá því að íbúarnir hafi kvartað yfir því hvað verkið gengi hægt og að stundum væri ekkert unnið í því vikum saman.
Guðjón Ingi Eggertsson, heilbrigðisfulltrúi segir að kvartanir hafi borist, en eftir að DV fjallaði um málið.
„Starfsmaður HER [Heilbrigðiseftirlits Reykjavíkur] fór á staðinn í dag og þá var vörubílinn farinn en tækin voru á sama stað,“ segir Guðjón Ingi. „Að sögn starfsmanns virtist sem framkvæmdir væru enn í gangi við Langholtsveg 134. Ákveðið var að aðhafast ekki í dag en fara aftur á vettvang síðar í vikunni til að meta hvort tækin séu í notkun eða bara í geymslu. Ef niðurstaðan verður að þau séu bara geymd þarna má búast við að límdur verði á þau viðvörunarmiði og eiganda þá væntanlega gefinn tveggja vikna frestur til að fjarlægja þau.“
Guðjón Ingi segir að heilbrigðiseftirlitið hafi heimild til að fjarlægja númerslausa bíla, bílflök og lausamuni. Lagt er áhersla á að fjarlægja númerslausa bíla og lausamuni, bílum sem er mengungarhætta af eða slysahætta. Ekki bíla eða lausamuni á einkalóðum eða fjöleignarhúsalóðum.
Eftir að kvörtun berst fer starfsmaður á vettvang og setur viðvörunarlímmiða á ef svo ber undir. Bíllinn er skráður inn í kerfi hjá verktaka sem hefur heimild til að fjarlægja bílinn í umboði Heilbrigðiseftirlitsins að fresti loknum.
Guðjón Ingi segir að Heilbrigðiseftirlitið geti ekki haft afskipti af vörubílnum þar sem hann er á númerum. „Sama gæti átt við um tækin ef á þeim er skoðunarmiði frá Vinnueftirlitinu sem er ígildi skoðunarmiða á bíl,“ segir hann. „Annað mál er svo samviska verktaka og hversu viðkvæmir þeir eru fyrir því að valda óþægindum eða ónæði við vinnustaði sína.“
