Á miðvikudag í síðustu viku fannst bandaríski kvensjúkdómalæknirinn George Tyndall látinn á heimili sínu í Los Angeles. Lögmaður hans skýrði frá þessu og sagði að vinur Tyndall hafi komið að honum látnum.

Ekki hefur verið skýrt frá dánarorsökinni en Tyndall var 76 ára þegar hann lést. Á næsta ári átti að taka mál hans fyrir hjá dómi en hann hafði verið ákærður fyrir að hafa misnotað rúmlega 100 sjúklinga kynferðislega. Hann átti ævilangt fangelsi yfir höfði sér.

Á 27 árum leituðu 400 konur til lögreglunnar í Los Angeles vegna framferðis Tyndall. Rúmlega 100 þeirra kærðu hann fyrir kynferðislega misnotkun.

Fyrir fjórum árum var hann ákærður fyrir að hafa í minnst 16 tilfellum misnotað ungar konur kynferðislega á læknastofu sinni í háskólanum þar sem hann starfaði. Þegar stúdínur komu á stofuna til hans í rútínuskoðun snerti hann þær á óviðeigandi hátt og lét óviðeigandi ummæli falla að þeirra sögn.

Nú virðist sem konurnar muni aldrei sjá réttlætið ná fram að ganga í máli læknisins.