Sigurveig Steinunn Helgasdóttir, 26 ára kona sem lýst hefur verið eftir í fjölmiðlum undanfarna daga, er á lífi. Hins vegar veit fjölskylda hennar ekki hvar hún er niðurkomin né í hvernig ástandi hún er.

Þetta kom fram í samtali DV við bróður hennar, Þorvald Sigurbjörn Helgason. „Við vitum þetta af því hún hefur verið að svara skilaboðum frá öðru fólki en okkur,“ segir Þorvaldur í samtali við blaðamann.

Sigurveig fór að heiman frá sér á aðfaranótt þriðjudags og síðan hefur fjölskylda hennar ekkert heyrt frá henni þrátt fyrir ítrekaðar tilraunir til að ná sambandi við hana. „Við vitum að hún er á lífi en við vitum ekki hvar hún er né í hvernig ástandi hún er,“ segir Þorvaldur.

Hann segir jafnframt með tilfinningaþrunginni röddu: „Við elskum hana, þráum að hitta hana aftur og viljum fá hana heim.“ Þorvaldur birtir sömu skilaboð til systur sinnar í Facebookfærslu fyrr í kvöld:

„Vegna þess að margir eru að hafa samband viljum við fjölskyldan greina frá því að samkvæmt því sem við höfum heyrt er Sigurveig á lífi. Við vitum hinsvegar ekki hvar hún er eða hvernig hún hefur það og hún hefur ekki haft beint samband við okkur. Við fjölskyldan erum innilega þakklát fyrir allan stuðninginn og viljum sérstaklega þakka Lögreglunni á höfuðborgarsvæðinu fyrir þeirra ómetanlegu hjálp. Sigurveig, við söknum þín og elskum og vonum að þú komir heim sem fyrst.“

Sigurveig er 170 cm á hæð og mjög grannvaxin. Ekki er vitað með vissu um klæðaburð hennar en líkur eru á að hún hafi verið klædd í svarta síða úlpu með hettu er hún fór að heiman.

Þau sem kunna að hafa upplýsingar um ferðir Sigurveigar eru beðin um að hafa samband við Lögregluna á höfuðborgarsvæðinu í síma 444 1000.