Bandarísk leyniþjónustan – og fleiri sambærilegar stofnanir á Vesturlöndum – telja að Pútín hafi fyrirskipað morð á Prígósjín til að hefna fyrir misheppnaða uppreisn fyrrum leiðtoga Wagner-málaliðahópsins í sumar. Eru miklar líkur taldar á að sprengju hafi verið komið fyrir í vélinni.
Pútín tjáði sig um flugslysið, sem varð tíu manns að bana, á opnum fundi Valdai-hugveitunnar í Sochi í Rússlandi í vikunni. Sagði hann ýmislegt benda til þess að handsprengja hafi sprungið um borð í vélinni sem hafi að lokum grandað henni. Þannig hafi einhvers konar leyfar af handsprengjum fundist á líkum þeirra sem voru um borð.
Pútín ýjaði einnig að því að áfengi og fíkniefni hafi komið við sögu og tók sérstaklega fram að því miður hafi ekki verið kannað hvort farþegar vélarinnar hafi verið undir áhrifum þegar vélin hrapaði.
Wagner-hópurinn, undir forystu Prígósjín, gerði skammvinna uppreisn í júnímánuði. Náði hópurinn að leggja undir sig höfuðstöðvar rússneska hersins í Rostov við Don og hugðist hann sækja að Moskvu til að hrifsa völdin í landinu. Uppreisnin var kveðin niður nánast jafn skjótt og hún hófst en það var ekki án eftirmála fyrir Wagner-leiðtogann sem lést aðeins tveimur mánuðum síðar.
Pútín sagði á fundi hugveitunnar í vikunni að þó nokkrir fyrrverandi meðlimir Wagner-hópsins væru gengnir til liðs við rússneska herinn.
