Vilhjálmur gerir málefni SKE að umtalsefni í pistli á Facebook-síðu sinni.
„Nú liggur krafa samkvæmt fjárlögum, ef ég skil þetta rétt, að Samkeppniseftirlitið skeri kostnað sinn niður um 24 milljónir. Þetta er gjörsamlega galið enda hefur Samkeppniseftirlitið sýnt og sannað hversu gríðarlega mikilvægt það er íslenskum neytendum.“
Hann segir að ekki þurfi að fara lengra aftur en í samráð skipafélaganna tveggja, Eimskips og Samskips, sem fjallað var um fyrir skemmstu. Hafi Samkeppniseftirlitið rétt fyrir sér sé um að ræða einn stærsta glæp gagnvart neytendum sem framinn hefur verið hér á landi, segir hann.
„Rétt að minna á sektargreiðslur vegna Samskips nema 4,2 milljörðum og sáttargreiðsla Eimskips nam 1,5 milljörðum og samanlagt mun því renna til ríkissjóðs 5,7 milljarðar. Eftir mínum upplýsingum þá hefur SKE sektað vegna brota á samkeppnislögum fyrir tæpa 20 milljarða og því óskiljanlegt að ekki sé lagt meira fé til að efla SKE.“
Hann segir að stofnunin hafi sektað fjölmörg fyrirtæki vegna brota á samkeppnislögum og mikilvægt sé að allir viti að brot á samkeppnislögum bitnar á neytendum og heimilum landsins.
„Á sama tíma og stjórnvöld leggja til niðurskurð hjá Samkeppniseftirlitinu þá eru stjórnvöld í Svíþjóð að leggja til 20% aukningu á fjárframlagi til Samkeppniseftirlitsins þar í landi. Meira segja vill Bandaríkjaforseti auka fjárheimildir til eftirlitsins þar í landi.“
Vilhjálmur segir það blasa við að sérhagsmunahópar í íslensku samfélagi vilji þrengja eins mikið að SKE eins og kostur er enda hræðast þeir stofnunina. Í fákeppnislandi eins og Íslandi sé nauðsynlegt að hafa öflugt Samkeppniseftirlit þar sem hagsmunir neytenda verði tryggðir fyrir brotum á samkeppnislögum.
„Ég skora á stjórnvöld og Alþingi að efla og tryggja SKE nægt fjármagn til að auka til muna eftirlit með samkeppnisbrotum, enda gríðarlegir hagsmunir í húfi fyrir íslenska neytendur. Aukið fjármagn til SKE skilar sér margfalt til baka fyrir íslenska neytendur og samfélagið í heild sinni.
