Pálmi ákvað að stinga niður penna eftir að hafa hlustað á talsmann Arctic Fish í útvarpsþættinum Sprengisandi. Að undanförnu hefur töluvert verið fjallað um slysasleppingar og áhrifin á hinn villta laxastofn. Þannig hefur verið boðað til mótmæla á Austurvelli næstkomandi laugardag gegn sjókvíaeldi.
„Náttúrumorð hafa verið framin fyrir framan nefið á okkur í áratugi, óafturkræf, endanleg. Þegar ég tala um náttúrumorð á ég við þá nöturlegu staðreynd að okkur hefur tekist á ótrúlega stuttum tíma að útrýma fjölda dýrategunda sem við sjáum aldrei framar. En meðan sumt er óafturkræft er mögulegt að snúa öðru við,“ segir Pálmi í grein sinni og bætir við að við getum, ef viljinn er fyrir hendi, stöðvað þá ógnvænlegu þróun sem nú á sér stað.
„Það er þó við ramman reip að draga því þeir sem standa að eyðileggingunni eru drifnir áfram af einni af dauðasyndunum sjö, þeirri sem heimtar alltaf meira, fær aldrei nóg. Og stjórnvöld sem eiga að sjá til þess að hlutirnir séu í lagi eru illu heilli undir hælnum á gróðapungunum. Við Íslendingar stútuðum síðasta geirfuglinum án þess trúlega að hafa nokkra hugmynd um það og komumst þar með á vafasaman afrekalista og nú stefnum við í að bæta villta laxinum okkar á þann sama lista. Þetta skemmdarverk er í boði lobbíista og stjórnmálamanna sem taka málstað þeirra og leyfa laxeldi í opnum sjókvíum við Íslandsstrendur,“ segir Pálmi meðal annars í grein sinni.
Hann bætir við að hann hafi á nokkuð langri ævi fylgst með tilraunum manna til að ala lax í opnum sjókvíum við Íslandsstrendur og frá fyrstu tíð barist gegn því. Endar hann grein sína á þessum orðum:
„Með eldi á laxi í opnum sjókvíum er verið að ráðast á það sem ætti að vera okkur Íslendingum dýrmætast af öllu, náttúru landsins. Stöðvum þennan ósóma!“
