Ný rannsókn á niðurstöðu krabbameinsskimana fyrir fjórum tegundum krabbameins benda til að aðeins skimun fyrir einni tegundinni lengi líf sjúklinganna að meðaltali.

Krabbameinsskimun gengur út á að leita að ummerkjum um krabbamein áður en einkenni koma fram. Markmiðið er að greina krabbamein eins snemma og hægt er til að auðveldara sé að takast á við það og þannig bjarga mannslífum.

Í nýrri rannsókn, sem var birt nýlega í vísindaritinu JAMA Internal Medicine, fóru vísindamenn yfir 18 rannsóknir, sem voru valdar tilviljanakennt, þar sem 2,1 milljón manna tóku þátt. Í þeim voru sex aðferðir við skimun fjögurra krabbameinstegunda rannsakaðar. Þetta eru brjóstakrabbamein, lungnakrabbamein, blöðruhálskrabbamein og ristilkrabbamein.

Niðurstöður rannsóknarinnar voru að ein tegund ristilkrabbameinsskimunar, sem felur í sér notkun holsjár til að skoða neðri hluta þarmanna, lengdi líf sjúklinga að meðaltali, um þrjá mánuði.

Vísindamenn sögðu í samtali við Live Science að þrátt fyrir niðurstöður rannsóknarinnar eigi fólk ekki að hrapa að ályktunum. Þeir sögðu að aðaltakmörkun rannsóknarinnar sé  hvernig hún var hönnuð. Eitt þessara atriða sé að hún nái til rúmlega tveggja milljóna manna en í hverri af rannsóknunum 18, sem voru teknar með í stóru rannsókninni, hafi fjöldi sjúklinga verið á bilinu 3.000 til 400.000. Einnig geti það haft áhrif að sumar rannsóknanna voru frá 1989 og það geti einnig takmarkað gildi þeirra.