Eitt krúttlegasta augnarblik ársins 2022 var þegar country söngkonan Dolly Parton og þungarokkarinn Rob Halford úr Judas Priest sungu saman lagið Jolene þegar þau voru tekin inn í frægðarhöll rokksins í nóvember. Fleiri sungu lagið með þeim, svo sem Simon Le Bon úr Duran Duran, Pat Benatar og Sheryl Crow, en augu allra voru á Dolly og Rob þetta kvöld.
Nú hafa þau ákveðið að endurvekja þennan galdur í nýju lagi sem mun koma út á væntanlegri plötu Dolly, Rockstar. Rockstar kemur út um miðjan nóvember og inniheldur bæði frumsamin lög og ábreiður og koma margir gestir að henni, einkum úr rokkinu.
Lagið sem Dolly og Rob syngja saman heitir Bygones en á uptökunni spila einnig Nikki Sixx og John Five, bassaleikari og gítarleikari hármetalsveitarinnar Mötley Crue.
Platan er sú fertugasta og níunda í röðinni hjá country drottningunni sem er nú orðin 77 ára gömul. Hún kemur út þann 17. nóvember og er nærri tveir og hálfur klukkutími að lengd.
Á meðal annarra gesta á plötunni má nefna Richie Sambora (Bon Jovi), Sting (The Police), Steve Perry (Journey), Ann Wilson (Heart), John Fogerty (Creedence Clearwater Revival), Stevie Nicks og Mick Fleetwood (Fleetwood Mac), Miley Cyrus, Debbie Harry (Blondie), Elton John, Lizzo, Simon Le Bon (Duran Duran) og Paul McCartney og Ringo Starr (The Beatles).
