Magnús Már Einarsson, þjálfari Aftureldingar, var að vonum svekktur í kvöld eftir leik við Vestra í kvöld.
Um var að ræða úrslitaleik Lengjudeildarinnar um hvort liðið kæmist í Bestu deildina að ári – Afturelding tapaði viðureigninni 1-0 eftir framlengingu.
Magnús var auðmjúkur í leikslok og óskaði Vestra til hamingju með sigurinn en vildi meira frá sínum mönnum á sama tíma.
,,Þetta er mjög súr tilfinning, við gerðum ekki nóg. Við vorum ekki nógu góðir því miður og því fór sem fór. Þetta ræðst á smáatriðum og þeir skora eitt mark og ég óska þeim til hamingju. Þetta er vel gert hjá þeim, hörkulið að sjálfsögðu og til hamingju Vestri,“ sagði Magnús.
,,Þeir eru mjög þéttir varnarlega og eru með besta varnarlið deildarinnar og við náðum ekki að spila nógu hratt og spila af nógu miklum krafti og því miður fór sem fór.“
,,Strákarnir fá frábæra reynslu að spila fyrir framan þrjú þúsund manns, fáir hafa gert það í mínu liði og mér finnst þetta fyrirkomulag allt í lagi. Við viljum koma hingað aftur á næsta ári eða þá vinna deildina.“