Brynjar Níelsson, fyrrum þingmaður Sjálfstæðisflokksins og fyrrum aðstoðarmaður dómsmálaráðherra, er þekktur fyrir að láta orð flakka sem vekja umræðu og athygli.
Sama á við um færslu hans á Facebook fyrr í dag, þar sem hann fjallar um Vog meðferðarheimili SÁÁ.
„Ég er ekki fullkominn frekar en aðrir menn. Á það til að gera mistök og jafnvel upp á bak, eins og krakkarnir segja. Soffía lætur mig miskunnarlaust taka ábyrgð á öllum mistökum. Þýðir ekkert að bera fyrir mig veikindi og hlaupa upp á Vog í hvert sinn,“ segir Brynjar.
Segir hann að slíkt yrði mjög íþyngjandi fyrir skattgreiðendur og segir hann að Soffía yrði mjög á móti því að Brynjar taki pláss frá fólki sem raunverulega þarf á því að halda. Vísar Brynjar jafnan til konu sinnar sem Soffíu frænku þegar hegðun hans ber á góma í eigin færslum.
„[Soffía] segir að ég geti bara farið á námskeið í hegðun, atferli og framkomu og greitt fyrir það sjálfur. Nóg er af slíkum námskeiðum í boði.“
Fyrr í dag skrifaði Sigmar Guðmundsson þingmaður Viðreisnar skoðunarpistil á Vísi, sem vakið hefur mikla athygli í dag, en miðlar landsins hafa gert frétt um pistil hans. Þar segir Sigmar frá því að hann hafi leitað sér aðstoðar á Vogi í sumar. Segir Sigmar að neyðarástand ríki í málaflokki fíknisjúkdóma og stefni í að 80 einstaklingar undir fimmtugsaldri muni láta lífið hér á landi í ár meðan þeir bíða á biðlistanum eftir innlögn. Segir Sigmar tímabært að stjórnvöld vakni af dvala sínum, meðferðarstofnanirnar megi ekki loka alfarið né yfir sumartímann vegna fjárskorts.
„Þessi sjúkdómur fer ekki í sumarfrí og því ætti meðferðarstarfið ekki heldur að gera það,“ segir Sigmar.
Hvort færsla Brynjars er fast skot á pistil Sigmars skal ósagt látið, en tímasetningin er allavega sérstök.
