Í tilkynningu frá Reykjavíkurborg til Kauphallar Íslands sem birt var fyrr í morgun kemur fram að borgin hafi ákveðið, í samræmi við útgáfuáætlun 2023, að efna til útboðs á skuldabréfaflokkunum RVK 32 1 og RVKN 35 1 miðvikudaginn 20. september næstkomandi. Í skuldabréfaútboði borgarinnar í síðasta mánuði var RVKN 35 1 annar af þeim skuldabréfaflokkum sem boðinn var út en öllum tilboðum í útboðinu var hafnað. Í útboðinu næstkomandi miðvikudag verður hins vegar RVKN 35 1 boðinn út að nýju með sömu skilmálum og í útboðinu í ágúst en þeir aðilar sem buðu í skuldabréfaflokkinn vildu fá hærri ávöxtun en þá vexti sem RVKN 35 1 bar.
Samkvæmt tilkynningunni sem birt var í morgun er heimild borgarinnar til lántöku á árinu 2023 21 milljarðar króna. Heildarfjármögnun ársins, fyrir þetta útboð, nemi 16,3 milljörðum króna að meðtöldum 6 milljarða króna ádrætti á langtímalán hjá Íslandsbanka.
Í tilkynningunni segir að skuldabréfaflokkurinn RVK 32 1 sé verðtryggður skuldabréfaflokkur sem beri fasta 2,5 prósent verðtryggða vexti og greiði jafnar greiðslur á sex mánaða fresti með lokagjalddaga 21. október 2032. Heildarstærð RVK 32 1 fyrir þetta útboð nemi alls 30,9 milljörðum króna að nafnvirði að meðtöldum eigin bréfum Reykjavíkurborgar vegna viðskiptavaktar, 960 milljónum króna.
Í tilkynningunni frá því í morgun segir um skuldabréfaflokkinn RVKN 35 1 að hann beri fasta 6,72 prósent óverðtryggða vexti og greiði jafnar afborganir á sex mánaða fresti með lokagjalddaga 26. mars 2035. Heildarstærð RVKN 35 1 fyrir þetta útboð nemi alls 21,5 milljörðum króna að nafnvirði að meðtöldum eigin bréfum Reykjavíkurborgar vegna viðskiptavaktar, 960 milljónum króna.
Skilmálar borgarinnar vegna RVKN 35 1 eru óbreyttir frá því í síðasta skuldabréfaboði borgarinnar sem fram fór 16. ágúst síðastliðinn. Í tilkynningu vegna þess útboðs kom fram að RVKN 35 1 bar fasta 6,72 prósent óverðtryggða vexti og greiddi jafnar afborganir á sex mánaða fresti með lokagjalddaga 26. mars 2035. Heildarstærð RVKN 35 1 fyrir það útboð nam alls 21,5 milljörðum króna að nafnvirði að meðtöldum eigin bréfum Reykjavíkurborgar vegna viðskiptavaktar 960 milljónum króna.
Skuldabréfaflokkurinn RVKN 35 1 verður þar með boðinn út þann 20. september með nákvæmlega sömu skilmálum og í skuldabréfaútboðinu 16. ágúst.
Daginn eftir það útboð, þann 17. ágúst síðastliðinn, sendi Reykjavíkurborg Kauphöllinni tilkynningu um niðurstöðu útboðsins. Þar kom fram að heildartilboð í RVKN 35 1 voru samtals 1, 05 milljarður króna að nafnvirði á ávöxtunarkröfunni 8,49 prósent – 8,63 prósent. Ákveðið var að hafna öllum tilboðum.
Aðilar sem buðu í RVKN 35 1 vildu því fá í minnsta lagi 26, 3 prósent hærri vexti en boðnir voru. Það ætti væntanlega að skýrast daginn eftir útboðið sem fyrirhugað er á miðvikudaginn næsta hvort að fjárfestar taka betur í boð Reykjavíkurborgar en þeir gerðu í útboðinu í ágúst.
Samkvæmt tilkynningu borgarinnar fer útboðið á miðvikudaginn fram með sama hætti og útboðið í ágúst. Útboðið verður með hollenskri aðferð, þar sem öll skuldabréf verða seld á hæstu ávöxtunarkröfu sem tekið verður. Reykjavíkurborg áskilur sér rétt til að taka hvaða tilboði sem er að hluta eða í heild eða hafna öllum. Niðurstöður útboðsins verða birtar opinberlega eigi síðar en næsta virka dag eftir útboð.
