Sex þingmenn Sjálfstæðisflokksins, Vinstri grænna og Flokks fólksins hafa lagt fram frumvarp um að kristinfræði verði aftur tekin upp í grunnskólum landsins. Að trúarbragðafræði verði ekki lögð niður en að kristinfræði verði bætti við og sett skör framar.
Fyrsti flutningsmaður frumvarpsins er Birgir Þórarinsson, þingmaður Sjálfstæðisflokksins. En eins og flestir vita er Birgir mjög trúaður maður og reisti kirkju á landareign sinni í Vogum.
Að baki honum standa flokksbræður hans Ásmundur Friðriksson, Vilhjálmur Árnason og Jón Gunnarsson, fyrrverandi ráðherra. Athygli vekur að Bjarni Jónsson, þingmaður Vinstri grænna, og Jakob Frímann Magnússon, þingmaður Flokks fólksins, eru einnig meðflutningsmenn.
Í frumvarpinu segir að í stað orðsins „trúarbragðafræði“ í annarri málsgrein 25. grein laga um grunnskóla eigi að koma „kristinfræði og trúarbragðafræði.“
Í greinargerð segir að með frumvarpinu eigi að auka veg kristinfræðikennslu í grunnskólum landsins og færa hana til fyrra horfs, eins og hún var fyrir gildistöku grunnskólalaganna árið 2008.
Áherslan helgist af menningu Íslendinga og tengslum við sögu kristinnar trúar í landinu.
„Eðlilegt hlýtur að teljast að fjallað sé ítarlega um þau trúarbrögð sem ríkjandi eru í samfélaginu og þekking á kristni og Biblíunni er forsenda skilnings á vestrænni menningu og samfélagi,“ segir í greinargerðinni. „Þekking á eigin trú er forsenda til skilnings á trú annarra og leið til umburðarlyndis. Skólanum er ætlað að miðla grundvallargildum þjóðfélagsins, sem hér á landi eru byggð á kristnum rótum.“
Segir að nám í kristinfræði sé mikilvægt til skilnings á hugtökum eins og kærleik, umhyggju og umburðarlyndi. Áhersla verði lögð á að nemendur læri að þekkja samkennd og siðferði sem birtist í guðspjöllunum og að nemendur öðlist þjálfun í siðferði með því að þekkja biblíusögurnar og merkingu þeirra.
Hlutfallið í faginu skuli vera 50 prósent kristinfræðikennsla og 50 prósent trúarbragðafræðikennsla. Þá skuli hækka tímafjölda samfélagsfræðigreina í skólunum, en þeir telja í dag 11,46 prósent.
„Flutningsmenn leggja til að áhersla á kristinfræði verði aukin innan trúarbragðafræðinnar. Hér á landi fer innflytjendum sem koma frá ólíkum menningarheimum fjölgandi og eykur það kröfur um umburðarlyndi og gagnkvæma virðingu,“ segir í greinargerðinni.
Með vaxandi fjölgun íslenskra ríkisborgara sem eru af erlendu bergi brotnir aukist nauðsyn þess að brjóta niður múra á milli menningarheilda og trúarhópa og auka þar með umburðarlyndi. Slíkt sé best gert með sérstakri fræðslu um ríkjandi trú landsins, kristni, og almennri fræðslu um trúarbrögð heimsins.
„Til að slík fræðsla verði að gagni og nái að stuðla að alhliða þroska nemenda og virkri þátttöku þeirra í lýðræðisþjóðfélagi þarf hún að ná til allra,“ segir í greinargerðinni.
Það sé skylda foreldra og samfélags að kynna trúna fyrir börnum. Annars sé verið að velja fyrir þau. Sá sem ekki kynnist trúnni geti ekki hafnað henni.
