Í tilkynningu sem birt er í Lögbirtingablaðinu í dag kemur fram að gjalþrotaskiptum á búi Armando Luis Rodriguez sé lokið. Lýstar kröfur í búið voru 148.014.891 króna en engar greiðslur fengust úr búinu upp í kröfur eða áfallna vexti og kostnað eftir úrskurðardag gjaldþrotaskipta.
Armando Luis Rodriguez hefur hlotið ýmsa refsidóma undanfarin ár fyrir m.a. skattalagabrot, peningaþvætti og líkamsárásir en hann var fyrr á þessu ári ákærður enn á ný.
Árið 2012 var Armando dæmdur, í Héraðdsómi Reykjavíkur, í 16 mánaða fangelsi fyrir þátt sinn í meiriháttar líkamsárás. Var hann ákærður ásamt fleiri mönnum fyrir að hafa veist að manni með ofbeldi, meðal annars með ítrekuðum höggum og spörkum víðsvegar í líkama hans, höfuð og andlit.
Í dómnum frá 2012 kemur fram að Armando hafi gengist undir viðurlagaákvörðun árið 2003 vegna umferðarlagabrots og árið 2005 gengist undir sátt vegna brota gegn lögum um ávana- og fíkniefni. Á árinu 2009 hafi hann verið í tvígang dæmdur, fyrst fyrir eignaspjöll en síðan fyrir brot gegn 1. mgr. 218. gr. hegningarlaga en þau ákvæði laganna varða líkamsárásir. Í dómnum segir enn fremur að í nóvember 2010 hafi Armando verið dæmdur fyrir brot gegn umferðarlögum. Á árinu 2011 hafi hann síðan í tvígang gengist undir sáttir vegna brota gegn umferðarlögum.
Árið 2019 var Armando dæmdur í þriggja mánaða fangelsi, í Héraðsdómi Reykjaness, fyrir þátt sinn í því að vísvitandi var staðið að röngum eða villandi tilkynningum til hlutafélagaskrár um hagi félagsins SS verk ehf. Í dómnum kemur fram að hann hafi árið 2018 verið dæmdur fyrir meðal annars brot gegn almennum hegningarlögum og lögum um tekjuskatt. Var honum þá gert að sæta fangelsi í sjö mánuði, en fullnustu refsingarinnar var frestað skilorðsbundið í tvö ár, en að auki var Armando gert að greiða sekt að fjárhæð 10.381.000 krónur. Dómurinn frá 2018 fannst ekki við leit á vefsíðu héraðsdómstóla en í dómnum frá 2019 segir að dómnum frá 2018 hafi verið áfrýjað.
Samkvæmt dómi Héraðsdóms Reykjavíkur frá því í desember árið 2020 var Armando ákærður fyrir að hafa ekki staðið skil á virðisaukaskatti upp á tæplega 2,7 milljónir króna vegna sjálfstæðs atvinnurekstrar síns. Hann var einnig ákærður fyrir að hafa ekki greitt tæplega 30 milljónir í tekjuskatt og útsvar vegna tekna af þessum rekstri. Sömuleiðis var hann ákærður fyrir brot á lögum um bókhald og fyrir peningaþvætti fyrir að hafa nýtt ávinninginn af því að greiða ekki tilskylda skatta í eigin þágu. Var Armando sakfelldur í öllum ákæruliðum og dæmdur í 14 mánaða fangelsi og til að greiða 96.000.000 króna í sekt til ríkissjóðs.
Í þessum dómi Héraðsdóms Reykjavíkur frá því í desember árið 2020 kemur fram að í febrúar sama ár hafi Armando verið dæmdur í fimm mánaða fangelsi, þar af fjóra skilorðsbundna í tvö ár, fyrir brot gegn fíkniefna-, áfengis-, lyfja-, lyfsölu-, tolla- og umferðarlögum. Auk þess hafi verið hann dæmdur fyrir brot gegn lögum um virðisaukaskatt og 262. grein almennra hegningarlaga, samanber lög um bókhald.
Dómurinn frá febrúar 2020 kemur ekki upp við leit á vefsíðu héraðsdómstólana.
Armando áfrýjaði dómnum frá desember 2020 til Landsréttar. Þar var niðurstaðan sú að ákæruliðunum um að hann hefði ekki staðið skil á tekju- og virðisaukaskatti var vísað frá Héraðsdómi þar sem ekki var talið að málarekstur hjá skattyfirvöldum annars vegar og Héraðssaksóknara hins vegar hafi verið nægilega samþættur í tíma svo talið væri að skilyrðum sem fram hefðu komið í dómaframkvæmd Mannréttindadómstóls Evrópu hefði verið fullnægt. Sakfelling Héraðsdóms fyrir brot gegn lögum um bókhald og fyrir peningaþvætti stóð hins vegar óhögguð og var Armando dæmdur í sex mánaða fangelsi.
Samkvæmt fréttum Mbl.is frá því um miðjan júní á þessu ári hefur Armando Luis Rodriguez nú verið ákærður enn á ný. Héraðssaksóknari hefur ákært hann og annan mann fyrir að hafa á árunum 2017 og 2018 látið hjá líða að greiða virðisaukaskatt upp á 32,4 milljónir króna vegna reksturs einkahlutafélags sem þeir voru í forsvari fyrir.
Segir í frétt Mbl.is að hinn maðurinn hafi verið skráður stjórnarmaður og framkvæmdastjóri en Armando hafi verið varamaður í stjórn og auk þess daglegur stjórnandi.
