Íbúi við Hrauntungu í Kópavogi hefur reist timburvegg til þess að stöðva gangandi umferð um lóðina hjá sér. Þó að veggurinn lengi leið vegfarenda að biðskýli strætó setur Kópavogsbær sig ekki upp á móti því að stígnum sé lokað.
Nokkur umræða hefur skapast um málið og lögmæti uppsetningarinnar á samfélagsmiðlum. Bent hefur verið á að með fækkun biðskýla strætó sé aukinn þrýstingur á að fólk komi sér gangandi á milli staða. Því vanti fleiri stíga eins og þennan.
Einnig lýsir fólk því að þurfa að klifra yfir eða fram hjá veggnum til að komast leiðar sinnar.
Málið á sér nokkra forsögu en í október árið 2019 hafði íbúi við Hrauntungu samband við umhverfissvið Kópavogsbæjar til þess að fá stígnum lokað. En hann liggur á milli Hrauntungu 115 til 119 og Digranesvegar 74 og 76.
Á stígnum liggja tröppur og hann hefur verið notaður til þess að komast á milli hverfahluta. Meðal annars fyrir íbúa í eystri hluta bæjarins að komast að biðskýli strætó.
Íbúinn benti á í erindi sínu að stígurinn leiði vegfarendur inn á einkalóð og af honum hlytist slysahætta. Það er vegna stuttra sjónlengda og blindhorna þar sem stígurinn tengist aðkomugötu að húsunum við Hrauntungu.
Í febrúar árið 2020 hafnaði bærinn erindinu vegna tengingar bæjarhlutanna og aðgengis að strætóskýli.
Íbúinn sendi aftur erindi í ágúst 2021, en nú til lögfræðisviðs, og var málið svo aftur tekið fyrir hjá umhverfissviði. Í ágúst árið 2022 ákvað umhverfis og samgöngunefnd að setja sig ekki upp á móti því að íbúinn myndi setja upp vegg til að stöðva umferð gangandi vegarenda. Einnig að bærinn myndi loka umferð af hinum megin frá.
„Það er niðurstaða umhverfissviðs og lögfræðings umhverfissviðs á stjórnsýslusviði að Kópavogsbæ er ekki fært að setja sig á móti því ef íbúar komi upp girðingu á sínum lóðarmörkum og loki þá fyrir umferð um stíginn og umferð gangandi inn á sína lóð,“ segir í bókuninni.
Tekið var undir þær ástæður íbúans að stígurinn leiði fólk inn á einkalóðir. Þá var einnig nefnt að stígurinn væri ekki á neinu skipulagi, hvorki aðalskipulagi né deiliskipulagi fyrir hverfið. Ekki hafi fundist neinar kvaðir í lóðaleigusamningi sem kveða á um að íbúar við Hrauntungu verði að hleypa gangandi vegfarendum í gegn. Að öllum líkindum séu þetta gömul skipulagsmistök.
Einnig að stígurinn sé ekki augljós gönguleið fyrir skólabörn og annar göngustígur sé við hlið þessa sem tengi hverfishlutann við biðstöð. Breytingin lengi hins vegar gönguleiðina um 90 metra.
„Erfitt er að sjá augljósan tilgang með þessum stíg og auðvelt er að sjá sjónarmið íbúa um amann sem af honum hlýst,“ segir enn fremur.
Eftir að veggurinn hafi verið settur upp muni Kópavogsbær loka hinum endanum, við Digranesveg og beina gangandi vegfarendum um stíga á milli Bröttutungu og Digranes annars vegar og Hrauntungu og Bröttutungu hins vegar. Kópavogsbær muni lagfæra þá tvo stíga í staðinn.
