Hljómsveitin Hr. Eydís sem sérhæfir sig í bestu 80´s lögunum á vinsælli rás sinni á YouTube hefur nú tekið skrefið lengra og sent frá sér frumsamið lag í samstarfi við tónlistarmanninn og 80´s goðsögnina Herbert Guðmundsson.
Lagið heitir Þú veist það nú og útsetningin vísar í áhrif þessa skemmtilega og skrautlega áratugar.
„Það kom enginn annar til greina í þetta lag en Herbert Guðmundsson. Hann sló náttúrulega í gegn með laginu Can´t Walk Away árið 1985, svo hann hefur sterka tengingu við tímabilið. Auk þess er hann frábær söngvari og góður og skemmtilegur samstarfsfélagi.“ segir Örlygur Smári höfundur lagsins og einn meðlima Hr. Eydís.
Textann við lagið gerði hinn hæfileikaríki Sálarmaður, Friðrik Sturluson.
;
Hljóðblöndun fór fram í Austurríki hjá samstarfsmanni Herberts, Lukas Hillebrand og hljómjöfnun (mastering) var í höndum Martin Scheer einnig í Austurríki.
