Landsréttur hefur staðfest gæsluvarðhaldsúrskurð héraðsdóms yfir manni sem grunaður er um fjölmörg afbrot. Hefur maðurinn verið úrskurðaður í gæsluvarðhald til 27. september.
Maðurinn er meðal annars grunaður um árás á hjónin Stefán S. Stefánsson og Önnu Steinunni Ólafsdóttur er þau voru á göngu á göngustíg í Fossvogi sunnudaginn 6. ágúst. Árásin átti sér stað um hábjartan dag og greindi DV svo frá:
„Stefán S. Stefánsson og eiginkona hans, Anna Steinunn Ólafsdóttur, urðu fyrir skelfilegri reynslu á laugardag er tveir ungir menn á vespu ógnuðu þeim með hnífi og rændu verðmætum af Stefáni. Ránið átti sér stað um hábjartan dag á göngustíg í Fossvoginum en sömu menn rændu einnig 35 þúsund krónum af eldri konu sem var að taka fé út úr hraðbanka í Hamraborg.
Mennirnir eru 18 og 21 árs. Þeir voru báðir handteknir á laugardag en sá eldri var úrskurðaður í gæsluvarðhald í gær, sunnudag.
Stefán táði sig um atburðinn í tveimur Facebook-færslum um helgina, sem hann veitti DV góðfúslega leyfi til að birta. Í annarri þeirra kemst hann svo að orði:
„Afsakið orðbragðið en andskotinn hafi það! Eftir að hafa búið í bandarískri stórborg í tæp fjögur ár (án þess að neitt kæmi fyrir) er ég rændur í mínum kæra Fossvogsdal, um hádegi! Annar þessara pörupilta hélt stórum hníf yfir brjósti mínu meðan hinn fór í gegnum vasa mína og stal öllu steini léttara.
Lögreglan brást hratt og vel við og er búið að handtaka sökudólgana. Okkur hjónum var illa brugðið en líður annars vel. Hef endurheimt það sem þeir tóku. Sá eini sem var afslappaður allan tímann var hundurinn okkar sem snusaði í næsta runna á meðan á látunum stóð og sýndi þessu engan áhuga, þá veit maður varðhunda-nytsemina á þeim bæ.“
Í seinni færslu um málið segir Stefán að ungu mennirnir sem í hlut áttu þurfi aðstoð en ekki dómhörku. Ennig sé mikilvægt að hlúa að grunnstofnunum í samfélaginu, til dæmis lögreglu og heilbrigðiskerfi:
„Kæru vinir
Við hjónin þökkum allar hlýjar kveðjur í okkar garð. Okkur líður ágætlega. Fórum í göngutúr aftur í gærkvöld.
Ég hvet ykkur sem hafið lýst ótta yfir þessu að láta þetta einangraða atvik ekki aftra ykkur frá því að njóta okkar yndislegu útivistarsvæða. Þó svo vopnaburður ungs fólks hafi aukist þá er þetta frávik.
Þessir ungu menn þurfa hjálp, ekki gapastokk eða þvíumlíkt.
Þetta undirstrikar bara mikilvægi sterkra stofnana okkar Íslendinga: Lögreglu, heilbrigðisþjónustu, menntamála og félagsþjónustu.
Ég mun svo eiga sér samtal við hundinn minn síðar.““
Maðurinn er einnig grunaður um rán í Hamraborg sama dag, eins og kemur fram hér að ofan, er hann rændu fjármununum af eldri konu sem var að taka fé út úr hraðbanka. Maðurinn er einnig grunaður um fjölmörg ofbeldis- og þjófnaðarbrot. Segir í úrskurði héraðsdóms að rannsókn lögreglu á brotum mannsins sé langt kominn og að gefin verði út ákæra gegn honum á næstunni. Meint brot eru samtals sautján. Hann er meðal annars grunaður um að hafa slegið mann í andlitið með bjórkönnu og fyrir að hafa stungið annan mann í höfuðið með áhaldi. Einnig er hann grunaður um fjölmörg þjófnaðarbrot.
Úrskurðinn má lesa hér.
