Tim Kaine sem situr í öldungadeild Bandaríkjaþings fyrir hönd Virginíuríkis sagði í viðtali við sjónvarpsstöðina ABC að sterk rök væru fyrir því að banna að nafn Donald Trump verði á kjörseðlinum í forsteakosningunum í Bandaríkjunum á næsta ári, á grundvelli 14. viðauka stjórnarskrár Bandaríkjanna.
Í þeim viðauka stendur meðal annars að einstaklingur sem hafi tekið þátt í uppreisn gegn stjórnarskrá Bandaríkjanna geti ekki gegnt neinu opinberu embætti í landinu.
Kaine sagði í viðtalinu að hann reikni með að skorið verði úr um þetta fyrir dómstólum. Hann tilheyrir Demókrataflokknum og segir að flokkurinn ætti að einbeita sér að því að sigra í kosningunum.
Lögfræðingar segja langsótt að hægt sé að beita þessum ákvæðum gegn framboði Trump. Þeim var bætt við stjórnarskrána í kjölfar borgarastyrjaldarinnar í Bandaríkjunum á sjöunda áratug nítjándu aldar. Það kemur hins vegar ekki fram í stjórnarskránni hvernig eigi að framfylgja þessu banni og því hefur aðeins verið beitt tvisvar en það var á nítjándu öld og beindist þá að fyrrum liðsmönnum Suðurríkjanna.
Embættismenn í ríkjum þar sem reiknað er með að verði mjótt á mununum á milli Demókrata og Repúblikana, m.a. Michigan og New Hampshire, búast við lögsóknum þar sem vísað verði til þessara ákvæða stjórnarskrárinnar. Þeir eru sagðir vera að kanna lagalegan grundvöll slíkra málsókna og hvort að það sé yfirhöfuð mögulegt, á grunni ákvæðanna, að banna það að nafn Donald Trump verði á kjörseðlinum í þeirra ríkjum.
Hópar andstæðinga Trump hafa haldið þessum ákvæðum stjórnarskrárinnar á lofti og hafa heitið því að höfða mál á grundevelli þeirra í því augnamiði að koma í veg fyrir framboð forsetans fyrrverandi.
Sumir íhaldssamir fræðimenn á sviði lögfræði eru sagðir taka undir að þetta sé mögulegt.
Tim Kaine segist telja að þessi ákvæði heimili að framboð Trump verði bannað. Hann vísar þar til árásarinnar á þinghús Bandaríkjanna, 6. janúar 2021, og segir hana hafa falið í sér uppreisn gegn stjórnarskránni enda hafi ætlun árásarinnar verið að trufla friðsamleg valdaskipti, sem séu byggð séu á stjórnarskránni.
Hann segir að hann hafi rætt það við aðra öldungardeildarþingmenn að beita 14. viðaukanum til að banna framboð Trump eftir að Bandaríkjaþing ákærði forsetann fyrrverandi í annað sinn, árið 2021, eftir árásina á þinghúsið. Meirihluti öldungadeildarþingmanna vildi sakfella Trump en 2/3 þeirra þarf til að sakfelling á hendur forseta nái fram að ganga.
Eftir að Trump var sýknaður af þessari ákæru þingsins ræddi Kaine, við kollega sína, um að samþykkja ávítur á forsetann fyrrverandi á grunni 14. viðaukans til að koma í veg fyrir að hann gæti gegnt opinberu embætti á ný. Þær hugmyndir náðu hins vegar ekki fram að ganga.
Það var CNN sem greindi frá.
