„Ég er búinn að gefast upp við að reyna að aðvara fólk,“ segir Carlos Mondragón Galera, starfsmaður Black Ice Travel Company, sem tók myndir af fáránlegri hegðun ferðamanna við Reynisfjöru. Eins og sjá má léku ferðamennirnir sér í stórhættulegu öldurótinu, þrátt fyrir viðvaranir um þá lífshættu sem getur skapast af slíku athæfi. Á myndunum sést meðal annars kvenkyns ferðalangur spóka sig í fjörunni í göngugrind og áttar sig eflaust ekkert á hættunni.

Carlos segir að hann hafi verið í talsverðri fjarlægð frá fólkinu og tekið myndirnar þaðan. Hann hafi því ekki náð að tala við fólkið og satt best að segja sé hann, sem fer reglulega með viðskiptavini í fjöruna mikilfenglegu, eiginlega búinn að gefast upp á því.

„Það er alltaf sama svarið. Mér er sagt að skipta mér ekki af. Sumir ferðamenn neita einfaldlega að hlusta þrátt fyrir allar viðvaranirnar,“ segir Carlos, sem veitti DV góðfúslegt leyfi til að birta myndirnar sem hann tók og birti á Facebook með yfirskriftinni: „Orðlaus“.