Veðurstofan hefur flýtt gulu viðvöruninni sem á höfuðborgarsvæðinu í kvöld. Hún byrjar nú klukkan 19:00 í stað 21:00 en endar líka fyrr. Það er klukkan 3:00 í stað 6:00.

„Við færðum hana fram. Við erum að hnika til tímasetningum samkvæmt nýjustu spám. Við áætlum að það dragi hratt úr og mesti vindurinn verði búinn eftir miðnætti,“ segir Elín Björk Jónasdóttir, deildarstjóri hjá Veðurstofunni.

Er því ekki seinna vænna en að drífa sig í að ganga frá útihúsgögnum og hreinsa frá niðurföllum áður en veðrið skellur á.

Aðspurð um hvort að útlit sé fyrir að veðrið verði eitthvað bærilegra en hefur verið spáð segir Elín svo ekki vera. Á höfuðborgarsvæðinu verður veðrið verst á milli klukkan 21:00 og 23:00 í kvöld.

„Úrkoman virðist ætla að vera nokkuð drjúg hér á sunnan og vestanverðu landinu,“ segir Elín um rigninguna.

Að sögn Elínar verður hvassast á norðanverðu Snæfellsnesi. Óljósara er hvar mesta úrkoman verður. Svipaðar tölur eru í kortunum á Barðaströndinni, á Suðurlandi upp að Fjallabaki og á suðausturhluta landsins í nótt og á morgun.