Bæði Franke og viðskiptafélagi hennar, Jodi Hildebrandt, voru handteknar eftir að „grindhoruðu“ barni tókst að flýja til nágrannans. Barnið bað nágrannann um mat og vatn en þá tók hann eftir því að barnið væri með taulímband og djúp sár í kringum ökkla og úlnliði.
Samkvæmt handtökuskýrslunni flúði barnið í gegnum glugga á heimili Hildebrandt í Utah. NBC greinir frá.
„Nágranninn sagði við lögreglu að barnið hafi virst vera skinhorað og vannært, með opin sár og taulímband á útlimum,“ kemur fram í yfirlýsingu frá yfirvöldum í Utah.
Barnið var flutt beint á sjúkrahús sökum alvarlegra áverka og ástands. Stuttu seinna fannst annað vannært barn á heimilinu sem var líka flutt á sjúkrahús.
Ruby Franke hefur verið mjög umdeild persóna á YouTube í mörg ár. Hún stofnaði rásina 8 Passengers með eiginmanni sínum, Kevin Franke, árið 2015. Myndböndin fjölluðu um kristilegar uppeldisaðferðir þeirra og líf þeirra og barnanna þeirra sex: Shari, Chad, Abby, Julie, Russel og Eve. Börnin gengu ekki í skóla heldur sinntu foreldrar námi þeirra heima.
Eins og fyrr segir hefur Franke verið mjög umdeild í gegnum tíðina, þá sérstaklega fyrir öfgakenndar og harkalegar uppeldisaðferðir sínar og hvernig hún hefur komið fram við börnin sín, einnig fyrir að virða einkalíf og friðhelgi barna sína að vettugi og deila persónulegum augnablikum þeirra á netinu fyrir alla að sjá.
Áhorfendur hafa sakað Ruby Franke og eiginmann hennar, Kevin, um að beita börnin sín ofbeldi í mörg ár.
Í júní 2020 var fjölskyldan tilkynnt til barnaverndar eftir að fjöldi netverja skrifuðu undir undirskriftalista á Change.org um að lögreglan eða yfirvöld myndu rannsaka heimilið. Undirskriftasöfnunin vísaði í atvik þar sem Ruby Franke birti myndband af 15 ára syni sínum, Chad, sofandi á grjónapoka og sagði að hann hafði verið látinn sofa þarna í sjö mánuði sem refsingu fyrir „hegðunarvanda.“
Í handtökuskýrslunni kemur einnig fram að Franke hafi vitað af ofbeldinu sem átti sér stað innan veggja heimilis Hildebrandt, þar sem hún tók upp myndband þar nokkrum dögum áður.
Fjögur yngstu börn Franke eru nú í umsjá barnaverndar í Utah.
Shari, elsta dóttir Ruby, birti yfirlýsingu vegna handtöku móður sinnar í gær:
„Þetta var stór dagur. Við fjölskyldan erum ánægð með að réttlætinu hafi verið framgengt. Við höfum reynt að segja lögreglu og barnavernd frá þessu í mörg ár og erum ánægð að það var loksins eitthvað gert í þessu.“
Franke og Hildebrandt stofnuðu umdeilda hlaðvarpið ConneXions sem hefur verið gagnrýnt fyrir að hvetja til grimmilegra uppeldisaðferða.
