Mikið fjaðrafok var í kringum leik Víkings og Breiðabliks sem fyrrnefnda liðið vann 5-3 í fyrrdag. Blikar vildu fá leiknum frestað í ljósi þess að liðið er í miðju einvígi um sæti í riðlakeppni Sambandsdeildarinnar. Kópavogsliðið vann fyrri leikinn gegn Struga í Norður-Makedóníu á fimmtudag 0-1 og mætir þeim hér heima í seinni leiknum næstkomandi fimmtudag.
Víkingur var ekki til í að spila leikinn í landsleikjahléi og hendur KSÍ voru bundnar þar sem ekki var hægt að finna nýjan leikdag.
Blikar voru klárlega bálreiðir yfir því að leiknum hafi ekki verið frestað. Liðið mætti ekki í Fossvoginn fyrr en tæpum hálftíma fyrir leik í fyrradag og leikskýrslan barst seint. Þá notaði liðið ekki klefaaðstöðu í Víkinni heldur fór beint út á völl.
„Ég held að séu allir sammála um að þetta var fáránlegt. Þetta var óvirðing við mótið, óvirðing við andstæðing, óvirðing við sjónvarpið, þeir voru bara sjálfum sér til skammar. Þetta er þeirra ákvörðun og þeir gerðu þetta svona, allt í góðu. En hver tilgangurinn var, er ég enn að reyna að púsla því saman,“ segir Tómas í Innkastinu á Fótbolta.net um gjörning Blika fyrir leik.
Tómas kaupir engan veginn þá skýringu Blika að þeir hafi mætt seint til að verja meiri tíma á heimavelli sínum í Kópavogi fyrir leik.
„Það voru allir að reyna að ráða í hverju þeir voru að mótmæla. Var þetta gjörningur því KSÍ hjálpaði þeim ekki? Voru þeir að gefa skít í Víking fyrir að hafa ekki gengið að þeirra kröfum og spilað þennan leik í landsleikjafríinu? Það virtist líklegra miðað við viðtalið fyrir leik að það væri Víkingur. Eftir leik talar Óskar um að þeir vildu eyða meiri tíma í Kópavogi, sem er algjör þvæla sem var líka búið að skrifa ofan í þá leikmenn sem fóru í viðtal eftir leik.“
Í Innkastinu var einnig farið yfir þá skýringu sem barst í bæði Stúkunni á Stöð 2 Sport og hlaðvarpinu Þungavigtinni í gærkvöldi að Blikum hafi ekki þótt útiklefinn í Víkinni ásættanlegur þegar liðin mættust í fyrra og því hafi undirbúningurinn farið fram í Kópavogi. Tómas kaupir þetta ekki heldur.
„Síðan vaknaði Óskar í gærmorgun og fattaði að hann kom þessu kannski ekki nægilega vel frá sér. Þá fer næsta leikrit af stað og símatími í Kópavogi hefst. Gummi Ben er mættur með það í Stúkuna að hann hafi heyrt það fyrir löngu að Blikar hafi ekki ætlað að mæta í klefann í Víkinni því það var ekki rafmagn í honum þann 16. maí 2022. Detti mér allar dauðar lýs af höfði, er Kristján Óli ekki með sömu sögu, sama kvöld,“ segir hann.
„Óskar afvegaleiddi umræðuna enn frekar og skyndilega var klefinn ekki boðlegur. Ég ætla rétt að vona að fólk hafi fattað hvað var í gangi því línan var svo sannarlega laus í Kópavogi í undirbúningi fyrir þætti gærkvöldsins.“
