Helgi Rúnar Bragason, körfuboltaþjálfari og framkvæmdastjóri Íþróttabandalags Akureyrar er fallinn frá, aðeins 47 ára að aldri. Frá þessu er greint á vef ÍBA en þar kemur fram að Helgi Rúnar hafi háð harða baráttu við illvígt krabbamein sem hafði hann undir að lokum.

Í umfjöllun norðlenska miðilsins Kaffið.is er fjallað um feril Helga Rúnars en hann var ráðinn í stöðu framkvæmdastjóra ÍBA í mars 2018 og gegndi hann stöðunni allt til síðasta dags en hann var í veikindaleyfi síðustu misseri eftir að hafa greinst með sjúkdóminn sumarið 2021.

„Helgi Rúnar var framúrskarandi starfsmaður, skarpur, fylginn sér, sýndi starfinu mikinn áhuga og metnað og dugnaður Helga Rúnars duldist engum sem með honum starfaði. Það sýnir sig meðal annars í því að Helgi Rúnar mætti reglulega á stjórnarfundi í veikindum sínum, þrátt fyrir að þurfa að hafa mikið fyrir því. Fyrst og fremst var Helgi Rúnar þó frábær manneskja og hans verður sárt saknað en minning hans mun ávallt lifa innan íþróttalífsins á Akureyri og víðar. Stjórn og framkvæmdastjóri ÍBA færa eiginkonu og dóttur Helga Rúnars, þeim Hildi Ýr og Karen Lind, ásamt öðrum ættingjum og vinum sínar dýpstu samúðarkveðjur,“ segir í tilkynningu ÍBA.