Mikið fjaðrafok var í kringum leik Víkings og Breiðabliks sem fyrrnefnda liðið vann 5-3 í gær. Blikar vildu fá leiknum frestað í ljósi þess að liðið er í miðju einvígi um sæti í riðlakeppni Sambandsdeildarinnar. Kópavogsliðið vann fyrri leikinn gegn Struga í Norður-Makedóníu á fimmtudag 0-1 og mætir þeim hér heima í seinni leiknum næstkomandi fimmtudag.
Víkingur var ekki til í að spila leikinn í landsleikjahléi og hendur KSÍ voru bundnar þar sem ekki var hægt að finna nýjan leikdag.
Blikar eru klárlega bálreiðir yfir því að leiknum hafi ekki verið frestað. Liðið mætti ekki í Fossvoginn fyrr en um hálftíma fyrir leik í gær og leikskýrslan barst seint.
Flosi var þó ekki til í að tjá sig um málið þegar 433.is leitaði eftir því í dag. Segir hann Blika komna með hugann við leikinn mikilvæga gegn Struga á fimmtudag og að hann líti svo á að málinu sé nú lokið.
Stuðningsmenn Blika hafa látið hressilega í sér heyra á samfélagsmiðlum og beinist reiði þeirra aðallega að KSÍ fyrir að finna ekki nýjan leikdag.
Klara Bjartmarz, framkvæmdastjóri KSÍ, ræddi málið stuttlega við 433.is í morgunsárið.
„Það voru allir möguleikar skoðaðir en það var ekki hægt að finna nýjan leikdag.“
Klara skilur pirring Blika og undir öðrum kringumstæðum hefði verið hægt að koma til móts við þá.
„Ég skil það og auðvitað hefðum við viljað hjálpa en það var ekki hægt að færa leikinn.“
