Þór Sigfússon, stofnandi og stjórnarformaður Sjávarklasans, segir mikinn áhuga vera fyrir grænum iðngarði í Helguvík. Þar sé verið að taka yfir 28 þúsund fermetra húsnæði sem Norðurál byggði. Þór er viðmælandi Ólafs Arnarsonar í nýjasta hlaðvarpi Markaðarins á Eyjunni.

Markaðurinn - Þór Sigfússon - Helguvík

„Við finnum fyrir miklum áhuga á starfsemi þar sem verður einn garður þar sem fyrirtæki geta nýtt sér samstarf við önnur. Það er ekki síst að hrat eins fyrirtækis verði gersemar annarra og við sjáum fyrir okkur möguleika í ylrækt og fiski,“ segir Þór

Aðspurður segir hann húsið henta frábærlega, það sé 28 þúsund fermetrar, og rýmin séu stór. Auk þess sé búið að skipta um jarðveg að miklu leyti og auðvelt sé að stækka í allar áttir.

Þór segir húsið vel byggt, steypa og stál séu góð, mikill metnaður hafi verið lagður í þetta af hálfu Norðuráls sem byggði húsið.

Þarna gefast að hans sögn möguleikar á a að nýta umfram orku og hratið frá fyrirtækjum og ekki skipti máli hvort þetta sér kallað klasi eða iðngarður. Þarna finni fyrirtæki sér hag í því að vinna saman vegna þess að það sé fjárhagslega og umhverfislega klókt.

Þór segir að græni iðngarðurinn í Helguvík njóti þess mjög að fara inn í tilbúið húsnæði vegna þess að starfsemi þar geti hafist strax af krafti á næsta ári í stað þess að lenda í grenndarkynningu eins og yrði, ef reynt yrði að fara í nýframkvæmdir annars staðar á svæðinu sem þýddi að mögulega yrði að bíða til 2026-27 með að hefja starfsemi.