Sigurður Eiríksson , eigandi Glerpró, hefur starfað við framrúðuviðgerðir – og skipti – síðan 1994 og starfsmenn fyrirtækisins búa að mikilli reynslu. Glerpró þjónustar bíla af öllum stærðum og gerðum en oftast fæst það við stóra bíla og rútur. Sigurður segir ástæðuna fyrir því vera að hinn almenni bíleigandi átti sig oft ekki á því að hægt er að gera við skemmdir í rúðum honum að kostnaðarlausu. „Oft þarf líka að skipta út rúðum og ekki hvað síst þegar skemmdir eru í sjónlínu ökumanns. Það fer eftir eðli skemmdarinnar en sumar þeirra hverfa fullkomlega eftir viðgerðina. Framrúðuviðgerðir eru vandasamt verk en við leggjum metnað okkar í að vinna hratt og örugglega.“
Það líður yfirleitt ekki nema um klukkustund frá því að bílinn kemur til viðgerðar hjá Glerpró þangað til hann er tilbúinn. „Það er pöntunarkerfi fyrir bílrúðuviðgerðir á heimasíðu Glerpró, glerpro.is, og þar er tengill þar sem viðskiptavinurinn skráir bílnúmer bifreiðarinnar og símanúmer sitt og hefur fyrirtækið samband við viðkomandi. Það er einnig hægt að hringja og panta tíma í síma 776-8600 eða senda póst á glerpro@gmail.com.
Fólk getur líka komið við hjá Glerpró að Hyrjarhöfða 2 því yfirleitt er farið beint í verkið.“
Sigurður ítrekar að farsælast sé að viðgerð eigi sér stað áður en raki kemst í sprungur. „Það er tvöfalt gler í rúðunum og öryggisfilma liggur á milli glerjanna. Ef raki kemst í hana getur hún gránað og þá verður grár blettur eftir í rúðunni sem næst ekki úr. Það er þó hægt að setja svokallaðan rúðuplástur á skemmdina til þess að koma í veg fyrir að óhreinindi og vatn komist í hana. Það er líka vert að hafa í huga að rúðuskemmdir þola illa hitabreytingar og algengt er að rúður springi út frá skemmdum,“ segir Sigurður.
„Rúðuviðgerðir eru bíleigendum að kostnaðarlausu þar sem kostnaðurinn er alfarið á ábyrgð tryggingafélaganna. Best er að koma í rúðuviðgerð um leið og sprunga kemur á rúðuna. Við getum þó alveg gert við gamlar skemmdir líka en þá er sú hætta fyrir hendi að vatn eða óhreinindi hafi komist í skemmdina og það næst aldrei alveg úr. En það er þó hægt að lagfæra meirihluta skemmda sem koma í rúður,“ segir Sigurður að lokum.
