Ríkissaksóknari hefur staðfest þá ákvörðun héraðssaksóknara að fella niður rannsókn á máli Vítalíu Lazareva gegn þeim Þórði Má Jóhannessyni, Ara Edwald og Hreggviði Jónssyni hefur verið hætt. Frá þessu er greint í Morgunblaðinu í dag.
Eins og frægt varð greindi Vítalía opinberlega frá því í upphafi árs 2022 að þremenningarnir hefðu brotið af sér gagnvart henni í sumarbústað í október árið 2020 og vakti málið þjóðarathygli og hafði margvísleg áhrif á starfsferil þeirra sem voru ásakaðir.
Þrátt fyrir fullyrðingar um annað þá lagði Vítalía ekki fram kæru gegn þremenningum fyrr en um mitt ár 2022 en í apríl 2023 komst héraðssaksóknari að þeirri niðurstöðu að fella rannsókn málsins niður. Þá ákvörðun kærði Vítalía til ríkissaksóknara og bar því við að hægt væri að afla frekari gagna auk þess sem ekki hefði verið rætt við öll vitni málsins.
Ríkissaksóknari hefur hins vegar nú komist að þeirri niðurstöðu að staðfesta ákvörðun héraðssaksóknara um niðurfellingu málsins.
Kæra þremenninganna á hendur Vítalíu fyrir fjárkúgun er þó enn til meðferðar hjá ríkissaksóknara. Héraðssaksóknari felldi þá rannsókn niður í júní síðastliðnum en sú ákvörðun var kærð til ríkissaksóknara.
