Áhrifavaldurinn og tónlistarkonan Berglind Saga Bjarnadóttir, betur þekkt sem Saga B., greinir frá því á Instagram-síðu sinni að systir hennar, Gunnhildur, hafi glatað aleigu sinni í húsbrunanum við Hvaleyrarbraut fyrr í dag. Tilkynnt var um eldinn um eittleytið í dag og hefur slökkvistarf staðið yfir fram eftir degi. Um var að ræða atvinnuhúsnæði sem leigt var út sem ósamþykkt íbúðarhúsnæði og voru sautján einstaklingar skráðir þar sem leigutakar.
Gunnhildur var sofandi í herbergi sínu ásamt kærsta sínum þegar eldurinn gaus upp. Það varð henni að öllum líkindum til lífs að móðir hennar og Sögu B., Guðrún Gerður Guðbjörnsdóttir er búsett rétt hjá og hún hringdi þegar í Neyðarlínuna þegar að hún varð vör við eldinn. Í viðtali á RÚV lýsir Guðrún Gerður því hvernig að hún hafi hlaupið í ofboði að húsinu þegar hún áttaði sig að heimili dóttur hennar var orðið eldi að bráð og ruðst inn.
„Ég hleyp upp stigann, hoppa upp á þakið og hleyp að glugganum þar sem dóttir mín býr,“ segir Guðrún í samtali við RÚV. Hún hafi náð að rífa upp glugga og öskra á þau að það væri kviknað í og í framhaldinu tókst parinu að forða sér í skjól.
Saga B. er greinilega að rifna af stolti yfir árvekni móður sinnar og deildi færslu á Instagram-síðu sína þar sem hún greinir frá hetjudáð móður sinnar.
Eins og gefur að skilja er Gunnhildur í slæmri stöðu eftir að hafa misst aleiguna í brunanum enda ekki hægt að tryggja húsnæðið. Hafa vinir og fjölskylda hennar sett af stað söfnun til þess að hlaupa undir bagga með henni.
