Eupen í Belgíu borgar tvær milljónir danskra króna fyrir Alfreð Finnbogason sem er á leið til félagsins frá Lyngby í Danmörku.

433.is sagði fyrst allra miðla frá því í morgun að Alfreð væri að ganga í raðir Eupen og gerir hann þar tveggja ára samning.

Alfreð er mættur til Belgíu til að ganga frá málunum en Lyngby hefur fengið Andra Lucas Guðjohnsen til að fylla hans skarð.

Danskir miðlar segja að kaupverðið sé 38 milljónir íslenskra króna en Alfreð kom frítt til Lyngby fyrir ári síðan.

Alfreð gerði nýjan samning við Lyngby í sumar en fer nú til Belgíu þar sem hann byrjaði atvinnumannaferil sinn árið 2011.

Atvinnumannaferill Alfreðs hófst í Belgíu hjá Lokeren árið 2011 og mögulega lokar hann hringnum sínum í sama landi.

Alfreð hefur átt magnaðan feril og spilað í Belgíu, Svíþjóð, Hollandi, Spáni, Grikklandi, Þýskalandi og nú síðast Danmörku.

Eupen keypti Guðlaug Victor Pálsson frá DC United á dögunum og kaupir nú íslenska framherjann. Félagið er í eigu Aspire Zone í Katar.