Wojciech Szczesny, fyrrum markvörður Arsenal og núverandi markvörður Juventus, virðist ekki hrifinn af þeirri þróun að fjöldi leikmanna flykkist úr Evrópufótboltanum í peningana í Sádi-Arabíu. Hann hefur engan áhuga á að fara þangað sjálfur.

Í kjölfar þess að Cristiano Ronaldo fór til Al Nassr síðasta vetur hefur fjöldi stjarna farið til Sádí. Sú nýjasta er Neymar sem skrifaði undir hjá Al Hilal á dögunum.

„Ég á nóg af peningum í lífi mínu. Ég kýs frekar spennandi áskoranir og að verja mark Juventus er besta áskorun sem ég gæti fengið,“ segir hinn 33 ára gamli Szczesny.

„Ég les ekki mikið um fótbolta en ég þekki einhverja leikmenn sem hafa farið til Sádí og það kemur mér ekki á óvart. Ég skil að einhverjir taki þessa ákvörðun og kannski er hún rökrétt. 

Mér finnst að maður eigi ekki að setja peninga í fyrsta sæti.“